كلام محترم جدًا من إنسان محترم جدًا وقدوة في الطموح 
.
.
السؤال اللي كان موجه لصلاح هو " إزاي بتتغلب على الضغط النفسي اللي بيقع عليك والناس كلها مستنية إنك تجيب أجوان سواء هنا أو في ليفربول؟ "
ف كان الجواب بتاع صلاح إنه لا يلتفت كثيرًا للسوشيال ميديا مع إنها حاجة كبيرة ، ولكـن هو عنده ما هو أهم ، وبدأ من هنا يعرج على نقطة مصر . .
فقال :
" أنا خلاص عقلي بقى تقريبًا مجدول ، بقعد مع اصحابي ، أقرأ حاجة ، لكـن مبضيعش وقتي إني ماسك التليفون وبشوف بيتقال عليا إيه ، أو إيه اللي حصل ، أنا مش مستني حد يقولي أنا كويس ولا وحش ، أنا عارف أنا كويس في إيه ، وعايز أزود إيه " ..
" أنا خلاص عقلي بقى تقريبًا مجدول ، بقعد مع اصحابي ، أقرأ حاجة ، لكـن مبضيعش وقتي إني ماسك التليفون وبشوف بيتقال عليا إيه ، أو إيه اللي حصل ، أنا مش مستني حد يقولي أنا كويس ولا وحش ، أنا عارف أنا كويس في إيه ، وعايز أزود إيه " ..
وهنا قال الجملة اللي اتقصت وبقت التريند الجديد في السف على الراجل لإنه أصلًا شعبيته الفترة الأخيرة في انحطاط لإن الناس بشكل ما شايفه إنه خذلهم . .
بيقول " وده ممكن يكون الفرق بيني شوية وبين أي حد تاني ، إحنا عقليتنا في مصر إن إحنا شوية متمرناش جامد مينتالي ومفيش حاجة عندنا مدرسناش ده في الاسكول فاحنا ضعاف شوية فيها ، ومبنحبش نتعلم كتير .. "
وكمل " احنا دايمًا عارفين كل حاجة ، ده مش غلط فينا أنا أهلي من مصر وأنا من مصر بس هي دي مشكلتنا ، احنا عارفين كل حاجة ومتعلمين كل حاجة ، أنا معنديش مشكلة إني أقول مش عارف ، معنديش مشكلة إني أتعلم أكتر " .
ولو جيت بصيت للكلام كله مش هتلاقي فيه حرف واحد يشين الراجل ، أو يقول إن الراجل مغرور أو غيره ، مع إني أنا شخصيًا معنديش مانع من الغرور إن كان بحق ..
أستاذي اللي مربيني من زمان في ثانوية عامة كانوا بيقولوا عليه مغرور وأنا كنت بقول لو ده مش مغرور ف مين يبقى مغرور ؟ الفكرة إن التربية بتاع الناس بتعلمهم إنه التواضع معناه إنك تحقر نفسك وإنك تقول إنك معملتش حاجة والله والجو ده في حين إن ده أنت مش ملزم بيه في كل الأوقات ومش لازم بما إني بتكلم عن نفسي إني مغرور .
دكتورنا وأستاذنا وعالمنا المصري الفيلسوف الوجودي العظيم د. عبدالرحمن بدوي أفرد لنفسه في ترجماته عن الفلاسفة اتكلم عن نفسه أكثر من جميع الفلاسفة ، مش بس كده ده كان بيحتقر علماء كتير زي ناس كتير يمكن منهم على سبيل المثال العقاد .
دكتور تاني كان بيقول عن روايته إنها لم يكتب ولن يكتب مثلها في الأدب العربي وفعلًا دي حقيقة مش بكلامي ده بكلام الناس كلها تقريبًا إلا اللي الناقم أو الكاره .
الراجل هنا لم يخطئ في حرف . .
إحنا الكلام ده بنقوله لبعضنا حتى بس هو علشان راجل عالمي الناس فاكره إنه كده بيفضحنا يعني وكأن صورتنا قدام العالم يعني هتتبدل بكلام صلاح أو بدون كلام صلاح
إحنا بنقول إننا عارفين كل حاجة ؟ آه طبعًا ، إحنا آلهة الفتي عند المصريين القدماء ، حتى المثال اللي هو ضربه وهو بيهزر إن لما توقف حد وتسأله على أي مكان في الشارع يقولك الطريق حتى لو هو مش عارف ،
بيقول إننا عاوزين نوصل لكل شيء بدون م نتعب ده خطأ ؟ طب امال كمية المتسلقين ، واللي بيعدوا بدون وجه حق ، واللي بيجيب واسطة وغيره وغيره دول جايين منين !
بيقول إننا معندناش صبر على التعلم ؟ طب ما احنا فعلًا معندناش صبر على التعلم ، وكمية المتعالمين اللي عندنا أكتر بكتير جدًا من أهل العلم ، ده حتى دي شكوى من شكاوي هل العلم إن الناس معندهاش صبر على التعلم ، وفي نفس الوقت عاوزين يوصلوا بدون مجهود واللي بيكافح علشان حلمه مش كتير .
صلاح لم يقل جديدًا ، وكلامه عادي جدًا ، وحقيقي وواقعي .
نيجي لغرض الكلام . .
مين قال إنه غرض الكلام إنه يتعالى علينا ؟
وصلنا 2019 ومرينا بكمية مشاكل لا حصر لها بسبب الإعلام والناس مش قادرة تفهم إن اللقطة اللي هتجيب الترافيك هي المهمة ، يعني مفيش مانع إن" إنسان عض كلب " علشان الترافيك ومنقولش العكس ، نقول إن " شيخ الأزهر يكلف إلهام شاهين بإدارة معرفش إيه " علشان الناس تظن إنها إلهام شاهين الممثلة . .
الناس بتستسهل . .
كام واحد جرب يدور على الفيديو ويشوفه ويفهم غرض الراجل ؟
صلاح بيقول أنا من مصر وأهلي من مصر وبيتكلم على اللي قدر يعدله في شخصيته ، واحنا لو عندنا علماء يعرفوا يحطوا سمات للشخصية المصرية الحالية هتبقى فضيحة بس احنا منحبش ننشر غسيلنا ، سيبه وسخ ومكمكم إنما متنشروش .
نيجي لنقطة " صنايع بسيون " و " ايه يا صندوق "
اللي الناس بتتنمر بيها عليه ، شيء عجيب جدًا ، شيء عجيب . .
الراجل بيقولك أزمتك فتقوم تصلحها مش أكتر من كده ، إنما قصة الكفاح بتاع العيل اللي جاي من لاشيء وبيطلع عينه أو زي ما بيقول عليه تريكة " جايبها من تحت أوي وهو يستاهل كل خير " تبقى هي النقطة اللي الناس بتتنمر عليه بيها إنه جاي من صنايع وبيقول سكول وبيتريق على الناس .
بس صلاح بيعمم كلامه على المصريين كلهم ..
يا سلام ؟ يا عمنا في 2019 أنت تحط في اعتبارك كده إن مفيش حد بيعمم حاجة ، كل قاعدة ليها شواذ ، وكلامه مش على كل البلد يعني مهو من البلد برضه ، هو بيتكلم عن التفكير العام للشعب بيروح فين وكلامه مفيهوش خطأ.
كل ده ليه ؟
ده كله علشان اللي الناس فيه ، الناس ناقمة على حياتها أصلًا ، ووجود صلاح كان شبه شيء خلى الناس تحب حياتها بطموحاتها اللي مش عارفه تحققها ، والناس فاكرة إنه هو كده بيتنكر ليهم وده مش حاصل ، هو مدرك تمامًا الشعب ده بيحبه قد إيه ونفسه يوصل قد إيه ، وهو حكى عن الحمل اللي هو بيحس بيه وبيخليه يطور من نفسه ، بس احنا خلاص قلبنا ، والمصري لما يقلب بينساك ويرميك في الزبالة وينسى أي شيء ، ويطلع شوية شيوخ يقولك صلاح مش قددواااااااااااااة ، ولا يخدم إلا نفسهعهعهعهعهعهع ، وعلموا ولادكوا إن لاعيبة الكورة شوية بهاييييييم ، وما إلى ذلك ، للأسف نفسيات مشوهة جدًا ، وعقليات أكل الدهر عليها وشرب .
صلاح شاب بيغلط وبيصيب ، وفي مكانة كبيرة جدًا ، طموحه كبير وإنه يوصل للي هو وصله أمل للشعب ده كله في كل شيء تاني ، وومضة أمل بتخلي الواحد حاسس إنه في خير قدام ، متقتلوش الأحلام علشان قررتوا إنه خلاص الراجل ميستاهلش .
نضارتك اللي بتشوف فيها الناس بتتحكم في رؤيتك صفيها ، صفيها وافهم معنى كون الراجل بيحاول يعمل شيء ومتزقوش لورا .
لينك الفيديو : https://www.facebook.com/A.Y.A2050/videos/2589255521087747/
إرسال تعليق