كتاب "ما لا يسع المسلم جهله" - ش. أنس السلطان

بوست يساوي 8 سنين من عمري . .
أنا بدأت أعرف البشمهندس في 2011 ، في ابريل 2011 وكانت أول ندوة أسمعها
" هندسة النهضة عند مالك بن نبي " 
مش فاكر كل اللي أنا حسيته ساعتها إلا إني حبيته جدًا . .

بعدها بفترة بدأت أسمع " الهندسة باللغة العبرية الفصحى " وأكدت في قلبي حبي للبشمهندس وأخدت قرار إني أنهي كل ما يتعلق بيه وده كان لأني في حاجات كتير كنت بفكر فيها لاقيته بيفكر فيها ، تجربة التعلم نفسها قررتها من قبل ما أعرف البشمهندس ، حاجات كتير كنت مؤمن بيها لما سمعته أكدلي عليها وحسيت بتوافقات كتير جدًا . .

أخدت فترات طويلة جدًا أسمع في التأسيس ، وفي علم النفس وليا ذكريات مع كل دورة من الدورات دي . .

حكاياته عن والده ، دخول أولاده ، أسئلة أستاذة أمنية ، كلامه عن ابني يحيى ، خناقاته مع أستاذة فاطمة ، الأستاذة مروة عندها سؤل ورا ، أنت شكلك في حاسبات ، أنت في كلية إيه ؟ هندسة أيوة مظبوط كده ، اديلها كورسين يا محمد . .
كل حاجة الراجل كلها محفوظة في قلبي . .
مقدمة دورة علم النفس وسؤاله . .
" هي الأستاذة كوثر موجودة " 

سمعت المحاضرة ما لا يقل عن عشرين مرة ، وسمعت الدورات كلها مرات كتير وكل شوية بقول ياريت الكوكب كله أيمن عبدالرحيم . . ، ياريت نص الكوكب التعيس ده أيمن عبدالرحيم ، ياريت الكون كله أيمن عبدالرحيم .

الرحلة كانت طويلة وغيرت مني كتير وفتحتلي مسارات كتير إلا إني مازلت في كل مرة بحبه أكثر من الاول .

قبل ما يتم سجنه فضلت أحلم 3 أيام ورا بعض إنه بيتسجن وكان الموضوع مسببلي شوشرة كبيرة جدًا ، وكان بيجبلي بناته الصغيرين عندي ، وكنت ببقى مستغرب ، وكلمت أصدقائي قولتلهم حصل كذا بس هو هيجبلي أنا بناته ليه . . ربما بناته دي كانت كم المحاضرات اللي هو عملها ، واللي لقيت نفسي مسئول بشكل ما قدام نفسي إني أتكلم عنها . .

الحمد لله أنا ممتن جدًا إني عرفت ناس بالبشمهندس ، انا متابع مشاهدات الدورات من أيام ما كان كل اللي بيشوفوا المحاضرة ألف واحد لحد ما بقى في محاضرات جايبة 100ألف مشاهدة ويمكن دي من أسعد اللحظات في حياتي .

البشمهندس كان من أكبر المحطات في حياتي ، وبالنسبالي غيابه شيء مربك بيضفلي كل يوم اكتئاب أزيد من اللي قبله وأنا مكتئب خلقة . . 

عارف إنه لو موجود دلوقتي كان قعد معايا وساعدني لكـن الله أعلم بحاله والله أعلم المستقبل مخبيلنا كلنا إيه . .

اللينك ده فيه كل اللي أنا كتبته عنه ، ولو في حاجة أنا نسيتها هبقى أضيفها ، اللينك ده مش مجرد لينك متجمع فيه شوية حاجات إنما هو جزء من قلبي لواحد من أقرب وأحب الناس ليا ، كل ورقة من دول ليا معاها ذكريات وقصص ، ربنا يرزقه ويخرجه بالسلامة وياخد بإيدينا وقلوبنا كلنا ...

https://drive.google.com/drive/u/0/folders/1ffgzZuwMBMWxd1RZWpv6qG6oYtqR4VJm