الناس بسهولة جدًا ممكن تنسي كل اللي أنت عملته معاهم ، ممكن تتنكرلك وكأنها متعرفكش ، ممكن بعد علاقة دايمة لسنين ييجي موقف واحد تلاقي الشخص زعل وخد جنب وبعد ، ممكن مع أقرب مشكلة تلاقي نفسك لوحدك والأشخاص اللي أنت تظن إن العون هييجي منهم يبقوا أول ناس يسيبوا إيدك وتحمد ربنا إنهم سابوا إيدك بس مداسوش على رقبتك كمان ، الشخص اللي أنت بتحسن إليه ده ممكن يعيشك حياتك كلها بعاهة نفسية لإن مستحيل تتخيل بأي حال إنه يسيبك ويبقى بالنسباله عادي إنما كمان الازمة إنه ممكن يضرك ويتجاهل تمامًا كل اللي عملته علشانه .
كمان الناس بتفتكر آخر فعل ، بتبص على آخر لقطة ، بتتجاهل المشوار كله وتبص على الخطوة الأخيرة ولذلك عادي جدًا إنك تلاقي واحدة بعد م تعبت وشقيت مع جوزها لسنين بعد ما ربنا يكرمه يبقى أول شيء يعمله إنه يرميها في الشارع ويروح يتجوز عليها عادي جدًا ، وممكن يجيب الغلط عليها كمان ، والعمر ده كله يبقى ملوش قيمة .
الناس لو بتحبك ف ده لا يعني شيء ممكن الصبح يتقلبوا عليك ، وتلاقي كل القلوب اللي كانت طالعة من عنيهم راحت وبقى مكانها تحقير واستهزاء .
الناس ممكن تقدرك جدًا علشان موقف واحد قولت فيه كلمة خدمت مصلحتهم أو توافقت مع كلامهم وبمجرد ما تختلف تبقى العدو اللدود ، ممكن يخافوا إنك تبقى متصدر لإنك مش مضمون ، أنت مش في الشلة ، لإن مفيش شلة = الحق ، الحق أعم وأشمل والشلة بتغلط وبتصيب لكـن لو أنت مع الحق كده أنت مش مع الشلة وبالتالي ممكن تترمى في الزبالة عادي جدًا .
الشخص اللي بيعينك ويقويك ويزيدك ممكن الصبح يكرهك ، ممكن ينساك ، ممكن يحتقرك ، ممكن يتحول للضد تمامًا ومش لازم ده يبقى بسبب حتى ، ممكن يقولك إنه طبع الحياة ، انشغلت والله ، الزمن نساني ، الحياة سخيفة ، وبالتالي كل اللي مشيوا مكنوش باعتنلك كرتونة بالأسباب ممكن يمشي ونقطة .
كل كلامي مش معناه إن زي ما أستاذنا بيغني في أحدب نوتردام " الناس وحوش مليانة شر أنا الوحيد في البلد دي تطمنلي " إنما معناه إنك وأنت بتبص للناس يبقى عندك التصور بتاع كمية الخير اللامحدودة الموجودة في الناس وجمبها تبقى فاهم الفكرة اللي أنا بتكلم عنها في البوست ده علشان يبقى واضح ليك السياق بشكل كامل .
طب وإيه المشكلة إنه الواحد يبقى متفائل ، ويشوف الخير بس اللي موجود في كل الناس؟
المشكلة بسيطة إن ده مخالف للواقع ، تكلفة الأمل والتفاؤل والنظرة اللي كلها حب بدون إدراك الطرف التاني دي إنك هتقع على دماغك من سابع سما بعد كام موقف ، ولذلك كلامي هو إجراء احترازي يحمي قلبك وعقلك في الزمن الفاسد .
مش بقولك اكره الناس ، ومش بقولك امش في الشارع دور على الشر إنما بقولك حط ده في دماغك حماية ليك ، أنت إنسان كامل محتاج تعيش وتتعايش مع الناس ، اجتماعي بطبعك مش تكره الناس وتروح تقعد لوحدك لا ، إنما تبقى مدرك فقط .
الإدراك ده هيخليك بشكل ما تقلل دايرة صداقاتك ، محدش يقرب من قلبك إلا اللي يبقى يستحق علشان تبقى في الحماية ، خلي في حاجز بين كلام الناس وبين قلبك ، متبصش على عظمتك في عيون غير عيونك ، متبقاش الناس كل حاجة في حياتك بحيث إنك تنهدم لو بقيت مع ناس أقل ، الحاجز هيخلي كلام الناس اللي من القلب يدخل مش مهم كلام معاك ولا ضدك مش مهم ، المهم إنه يبقى كلام هدفه يفيدك مش يحطمك ، اوعى تظن إن الكلام الحلو ممكن ميحطمكش بالعكس ، فالمهم إنه الحاجز هيصفيلك الخير ويدخله ، والباقي يروح بغير رجعة .
الإدراك ده هيخليك قدرتك على التحمل أعلى ، وهيخليك تحب الناس أكتر ، لإن أنت عارف إنه بشر ، ممكن يبقى من جواه في نصه سواد عادي ، وأنت بتحبه وأنت مدرك ده ، حتى لو أذاك فأنت مدرك ده وتأثيره عليك أقل .
درويشي بيقول " أدرب قلبي على الحب كي يسع الورد والشوك "
يا الله على الجمال .. حاسه ؟ حاسس بيها " كي يسع الورد والشوك ! " ، المرحلة اللي هتبقى مش عاوز حاجة من حد ، وأنت جواك كله خير ، بتحب للناس الخير وبتتمنى للي جبل على الشر إنه يكون أفضل ، المرحلة اللي هتخليك راحتك النفسية أعلى من أي شر ممكن يطولك هي دي اللي أنت مهم إنك تسعالها .
يا الله على الجمال .. حاسه ؟ حاسس بيها " كي يسع الورد والشوك ! " ، المرحلة اللي هتبقى مش عاوز حاجة من حد ، وأنت جواك كله خير ، بتحب للناس الخير وبتتمنى للي جبل على الشر إنه يكون أفضل ، المرحلة اللي هتخليك راحتك النفسية أعلى من أي شر ممكن يطولك هي دي اللي أنت مهم إنك تسعالها .
اوعى تكره الناس ، الخير موجود بس الشر اللي في كتير من الناس ممكن يؤذيك وهذا شأنك تعلم إنك تتعايش معاه وأنت مدرك إن الإنسان طبعه بينازع بين خيره وشره .
صباحكم خير 
إرسال تعليق