كتالوج شخصي "1"

 ميزة التعلم الذاتي هي نفسها أزمة التعلم الذاتي، التعليم النظامي رغم كل السوء المدفون فيه إلا إنه فيه ميزة، وهو إنه فيه ديدلاين، في نقطة ما أنت هتتوقف عندها عن المنهج ده، وتبدأ تنتقل لدرجة أعلى، أو هتعيد نفس المستوى مرة تانية، أينعم في نهاية المطاف أنت مش مطلوب منك نظاميًا إنك تكون أجمد حاجة؛ لإن في نهاية المطاف عندك مدى واسع بداية من 50% وأحيانًا 60% لحد 100% كل الناس دي هيحصلوا على شهادة يقال فيها إنهم "اجتازوا" الـ"مش عارف إيه" بنجاح، وبعد كده الشهادة في كثير من الأحيان مش بتكون مؤثرة بالدرجة يعني، لا مؤثرة في سوق العمل، ولا مؤثرة بشكل جدي في الوظيفة.

هامش: قصة تأثير الشهادة ده مش شيء ثابت، ممكن بعض الوظايف تعتمد على شهادتك طبعًا، كمان التقسيمات والفروع اللي داخل الكلية أحيانًا وكثيرًا ما بتكون معتمدة على درجاتك داخل الكلية، النقطة الثانية إن مش مقصودي هنا أبدًا التحقير من شأن الشهادة، وحتى لو كان ده متضمن فده لا يعني أبدًا إنك تاخدها حجة، ومتذاكرش، لإن الشهادة ملهاش لازمة، بل الإنسـان على نفسه بصيرة، اركز.

لكن النقطة بتاع الديدلاين دي بتكون مرعبة للكثيرين، وعلشان كده في كثير من الأحيان بتعتبر نقطة ضعيف للنظام التقليدي، ولذلك بيكون الهروب لنظام التعلم الذاتي.

التعلم الذاتي مفيهوش خطة محكمة، مفيهوش رقيب، مفيش حد مسيطر، لو اتنقلت من خطة لخطة محدش هيكلمك، لو فضلت في نفس المستوى عشرين مليون سنة محدش هيحس بيك، ودي أزمة، وأزمة كبيـرة جدًا، تكاد تخلي جزء كبير من التعلم الذاتي هو تعلم لا قيمة له، بغض النظر عن إنك ممكن بدورة واحدة تستفيد ماديًا، وروحيًا، وثقافيًا أفضل من كل التعليم اللي أنت أجبرت عليه، لكـنه في نهاية المطاف مش دليل على شيء، لإنه مش محدد المعالم، وعلشـان كده، كل ما تقدر تلزم نفسك بوقت شبه محدد في رحلة تعلمك الذاتي، ولو كان الوقت ده عبارة عن الوقت اللي هتقضيه يوميًا أسبوعيًا فأنت هتبقى بتعمل شيء كويس، والعكس لو أنت سيبت نفسك، وجيت في يوم، بصيت، ولقيت إنك بعد عشر سنين تعلم لسه بتبدأ من النقطة "صفر".