اتكلمنا كتير في موضوع التربية ، ويبدو بشكل ما وبكلام المتخصصين إنه الجيل ده مهتم بموضوع التربية أكثر من الأجيال السابقة له وده له أسباب كتير يعني ميهمناش إننا نفصل فيها دلوقتي ولكـن يمكن أبرز شيء حفز على ده الانفتاح الكبير الحاصل حاليًا في مصادر التعلم ، والسوشيال ميديا بكل منافعها وأضرارها ، والأضرار الكبيرة جدًا الواقعة على الجيل ده كله ودي مش خاصية للجيل ده ولكنها ظهرت أكثر حاليًا مع الانفتاح الكبير ده . .
في كل مرة بنتكلم في الموضوع بيبدأ الناس يسألوا طب واللي عاوز يقرأ ، طب واللي عاوز يفهم أكتر ، طب واللي اتعمل فيه اللي بتقوله ده بالظبط وعاوز يحمي الجيل الجاي من الأثر اللي وقع على نفسه يعمل إيه . .
المفروض البوست ده هيقولكوا تعملوا إيه . .
التربية ممكن نقسمها لشقين . .
- شق نظري : وده اللي أنت هتقرأ فيه كتاب واتنين وعشرة ، وهتاخد من هنا المفاهيم والاقتراحات والنظريات وغيره علشان تقدر تتعامل مع الطفل الصغير ده من أول ما يتولد أو من قبل ما يتولد في الحقيقة لحد ما ربنا يكرمه كده ويكبر علشان يقاسي ويكافح في العالم المتوحش ده .
والكلام النظري هو كلام نظري ، مهم آه ، نافع آه ، لازم آه ، واجب آه ، لكـن يظل = كلام .
مش معنى كده إنه مش مهم ، وإلا لو كان مش مهم يبقى لازمته إيه الكتابة عنه دلوقتي إنما كل الفكرة إنه إطار نظري .
- الشق العملي : الشق التاني هو الشق العملي ، هو اللي أنت استفدته من الكتاب ، اللي أنت عملته ، والتجربة دي تجربتك أنت مش تجربة حد تاني ، الإنسان مختلف ، كل إنسان له بصمة ، فأنت بتتعامل مع نوعيات مختلفة تمام الإختلاف ، وفطر مختلفة عن بعضها تمامًا ،وبالتالي أنت في الجانب النظري هتاخد كم كبير جدًا من الأفكار والحلول والمبادئ والنظريات اللي هتخليك تفكيرك يتسع لدرجة إنك يبقى عندك قدرة على التفكير في الحلول المختلفة بس وأنت بتطبق اوعى تظن إنك هتدخل كل القرود على الشجرة ، أو هتخلي السمكة والقرد يطلعوا سوا يتسلقوا الشجرة ، أو تظن إن منهج واحد هيتطبق على كل الناس فيطلعوا بالشكل الفلاني . . لا خالص الموضوع مختلف جدًا ، وتجربتك مع طفلك مهما زاد عدد الأطفال تظل تجربة فريدة بما فيها من مشاكل وطموحات وتحديات .
طيب الشق النظري ده هتجيبه منين ؟
في البوست ده جايبلكم ترشيح متخصص في التربية بيرشحلك أكثر من 400 كتاب مهمين جدًا جدًا في موضوع التربية . .
الكتب مقسمة لـ :
- كتب للعروسين ودول حوالي 71 كتاب .
- كتب للوالدين : ودول 143 كتاب .
- كتب للشباب : ودول حوالي 72 كتاب .
- كتب للفتيات : ودول حوالي 50 كتاب .
- كتب لتنمية الإبداع : حوالي 28 كتاب .
- كتب للتربية الإيمانية : 4 كتب .
- كتب للروايات : حوالي 36 كتاب .
وقبل أن نضع الكتاب أود التأكيد على فكرة الدكتور اللي رشح الكتب دي كلها . . .
1- لا يعني ذكر الكتاب تزكيته تزكية مطلقة إنما الغرض من ذكره أنه أجود ما يوجد في الباب .
وهذا الاستدراك مهم جدًا وإن كان طبيعي ومنطقي ومفهوم ، فأنا شخصيًا رشحت قبلًا كتابًا لأحد الناس ثم قال لي بعد ذلك أن في الكتاب مخالفات فقلت أني أعرف ، ولا يوجد كتاب يخلو من ذلك فهل لا أرشح كتبًا أبدًا ؟
فالطبيعي والمعروف والأولى أن ترشيح الكتاب يعني أنه جيد وفقط .
3- لا يعني ذكر هذه الكتب عدم وجود أفضل منها .
4- بعض الكتب تحل محل الأخرى .
5- ينبغي قراءة الكتاب الواحد جيدًا ثم العمل به في محيط الأسرة.
وأترككم مع الكتاب . .
إرسال تعليق