8.كل ما تحتاجه في دورات م. أيمن عبدالرحيم ( تفريغات - لينكات - ترشيحات - تكليفات - مراجعات كل الدورات )

مساء الخير . . 

في خناقة - عظيمة جدًا - دايرة حالياً بسبب فتوى " الشطاف " وهل هو بيفطر ولا لا واللي مبنية على فيديو الشيخ أنس في دورة فقه الصيام ، ومن ناحية تانية الناس اللي معترضين على كون الكلام ده علمي ولا لا ، ومهم أصلاً ولا لا ، مع كثير من المطالبات إن الناس تكبر بقى وتبطل تتكلم في الكلام الفارغ ده وارتقوا الناس طلعت القمر وما إلى ذلك .

والحقيقة خلوني أقولكم إني مبسوط من الخناقة دي علشان كام نقطة

* الخناقة فكرتني بنفسي في أيام الثورة والحماس وما إلى ذلك ، والواحد كان متخيل أحلام وطموحات عريضة وبتاع ، وصحي على واقع إسلامي يجيب الشلل الرعاش لكل كائن حي يتحرك على قدمين أو حتى بيتحرك مع حركة الشمس

وقتها كانت فترة نفور عامة من الدين وكنت وقتها أنا شايف إنه الدين بيدخل في كل حاجة وده غلط ، وكنت بتريق بشكل ما على الكلام بتاع إن الدين بيعلمك تعمل حمام إزاي ، وتدخل الحمام برجلك اليمين ولا الشمال وكنت شايف إنه يعني الناس فعلاً وصلت القمر وإحنا هنا بنهاتي في . . .

وكان المنجد الوحيد ليا في الموضوع ده الناس اللي بتتبنى نفس وجهة نظري وهي إن الكلام ده خلاص عفى عليه الزمن فبدأت أرتبط شوية أو شويتين بكل شخص مثقف دينيًأ وإن كان مش عالم دين ، أو مش دارس فقه وعقيدة وما إلى ذلك ، أو دارس الكلام ده بس في نفس الوقت بينقد كل العته الموجود على الساحة . .

بعدها بفترة لقيت إن اللي أنا شوفته ده نمط وحيد من الدين، النمط بتاع الناس اللي عايشة حياتها كلها بتتكلم في جانب واحد فقط مش موجود عند كل الشيوخ ولا حاجة ، في ناس بتنقد الإلحاد بشكل عظيم جدًا ، في مراكز بحثية مهتمة فعلاً بقضايا المسلم المعاصر ، في ناس قارئة وفاهمة ومطلعة بالشكل الكافي فعلاً وفي ناس مبهرة تقعد معاها تطلع مش لاقي دماغك من كتر كم المعلومات اللي هتلاقيه مبلور فكرة الدين كفكرة أساسية منطلق من مرحلة سابقة مدركة ليه الإسلام خصوصاً ، ومن ثم بعد كده يبني رؤية كاملة على أساس فهمه للإسلام ده فبدأت رؤيتي تتحول واحدة واحدة وفهمت حاجات كتير أنا مكنتش فاهمها وإن كان فضل برضه النقد للشيوخ اللي بتتكلم في شيء واحد ده موجود ولكـنه بقى أقل جدًأ ، وبقيت قادر بشكل ما أفرق بين دور كل شيخ والفرق بينه وبين التاني ومين متخصص في ده ميعرفش أصلاً غيره ، ومين منفتح على العالم هيكلمك عن كتب عالمية وروايات ونظريات ومواويل علشان تفهمها تاخد مجهود كبير فضلاً عن إنه بيتكلم في فلسفتها ونقدها

وقتها فهمت بشكل ما شيء بسيط جدًا وإن كنت وقتها معرفوش وهي إنه ما من فعل من أفعال المكلفين إلا ولله فيه حكم ، علمه من علمه وجهله من جهله .

يعني دخول الحمام بالرجل اليمين ولا الشمال ده حكم لله ، الشيء ده يفطر ولا ميفطرش ده حكم لله ، كان عندي وقتها شك واضطراب في أكثر من نقطة من ضمنهم إن الكلام ده مش في القرآن ، وبدأت ألاقي إن الواحد داخل في سكة إنكار للسنة بدون ما يدري أصلاً ولكـن بعد قليل جدًا والله من التعلم الواحد بقى فاهم بشكل يأهله إنه يفهم إنه الفقهاء دول مش بيخترعوا دين بل هما بيجاوبوا لك على كل الأسئلة المتاحة والغير متاحة ، والحلول الواردة والأفكار اللي بتتسرد بتلاقيها مغطية تقريبًا كل اللي هتفكر فيه وزيادة ، وبالتالي بتلاقي كلام من ألف سنة بيجاوب عن اللي انت بتفكر فيه لإن هما برضوا فكروا فيه وهما جيل ورا جيل وبالتالي النبع ده متجدد ومش ثابت ومتحجر زي م أنت متخيل .

ف مادام عرفت بنفسك وأيقنت إن في إله ، وإن الإله ده أرسل رسل ، وإن الرسل جم برسالة ، وتحققت من صحة وصولها ، وعرفت إن الرسول اللي ربنا بعته هو اللي قالك الكلام بتاع ادخل إزاي واخرج إزاي ف الأمر بقى بسيط جدًا .

وبقى الفعل البسيط بتاع أدخل الحمام إزاي مرتبط بوجود إله من عدم وجوده وبقيت فاهم يعني إيه أمر ويعني إيه امتثال للأمر مادمت عرفت إنه فعلاً أمر ب ده . .

أنا لو الفيديو ده عدى عليا من 8 سنين أنا كنت هتريق مع اللي بيتريقوا ، وهشير وهقول شوفوا شوية الشيوخ السلفيين الجهلة ! 

مع إني أنا اللي كنت جاهل لدرجة إني كنت فاكر في وقت ما إن كل الشيوخ = سلفيين ، وإن كل السلفيين = سلفيين تيار واحد وإن الأمور واضحة وصريحة وباينة وإني علامة الزمان ، وأنا مكنتش فاهم والله .. 

ف أنا من ناحية بحمد ربنا على الحال اللي بيقولي إني واحد بسيط بس خدت خطوة واتنين قدام لسه الناس بتتكلم في موضوعات أنا تجاوزتها من زمان ، ومش بس كده بل أنا مش مضايق من الناس اللي مش فاهمة بل أنا مشفق عليها . .

أصل طبيعة السوشيال بتعرضك لموضوع ما بسرعة ويموت ، وموضوع بسرعة ويموت فالبيئة مش صالحة أبدًا للإنسان إنه يتعلم ، ولو حبيت تتعلم نقطة التريند الجاي هيشتتك وهيخليك عاوز تدخل على اللي بعده . .

لدرجة إنك لو قعدت مع حد من اللي بيتريقوا وسألته . .
دورة بتتكلم عن أحكام الصيام عاوز تسمع فيها كلام عن صنع المفاعلات النووية إزاي ؟ 

لو هو صادق مع نفسه أظنه هيفهم السياق والمجال والترتيب ده اللي هيبين إننا متصلين بأول نقطة في المثلث من فوق ، مش إحنا بنتكلم على شيء معلق في الهوا ملوش بداية ولا نهاية . 

فمع عدم وجود العلم ومقصدش أضايق حد أبدًا والله طبيعي جدًا إنه يبقى ده رد فعل الناس .

أخيرًا كلام من نوعية منصة شيخ العمود بتقدم إيه غير الهبل بتاع الشطاف
فهو برضه للأسف كلام يستحق الشفقة والواحد بيبتسم ويسكت أصله مش شيء طبيعي ، والواحد الحمد لله نضج بما فيه الكفاية علشان يفهم إنه تغيير آراء الناس نحو أو ضد شي عملية معقدة مش سهلة أبدًا إنها تحصل والواحد معندوش أي أمل إنه أي حد يفكر في الكلام يعني وإن كان يظل متاح ولكـن شهوتنا في تغيير عقلية الناس راحت الحمد لله .

منصة شيخ العمود بتقدم دورات في المنطق ، والسياسة ، والاقتصاد ، والإدارة ، والبيولوجيا ، والتربية ، والأنثروبولوجي ، والفسيولوجي . . 

وبتقدم مع ده علم شرعي بتقدم لغة عربية ونحو وصرف وبلاغة وشعر وعروض وبتقدم فقه وعقيدة وتفسير وتزكية وبتقدم غيرهم . .

وده برضه مش متعلق في الهوا ده كله متعلق بوجود إله ، أرسل نبي ، والنبي جه بتعاليم وعرفنا المثلث بتاع الله والكون والإنسان وإن كل ده مرتبط مع بعضه في سياق واحد ورؤية مختلفة تماماً عن الجانب المادي اللي بيخليك منك للطبيعة مباشرة ، أو منك لنفسك.

الرؤية الكلية اللي بتجاوبلك على أسئلتك أنت جاي منين ، ودورك إيه هنا ، ورايح فين كلها اتعلمناها من الدين وأشياء ، ولا يعني إن حضرتك مرتبط بسياق ثقافي معين وتجهل سياق آخر إنك تحكم عليه بالتفاهة أو اللامعقولية أو الرجوع للقرون الوسطى

قليل من الإنصـاف ، والحمد لله أنزل أنا من على المنبر بقى قبل م أتشتم .