أنا لو عندي أطفال بيدخلوا على الإنترنت ف قبل ما أقفل عليهم المواقع الإباحية هقفل برنامج الميوزيكلي ، وإعلانات الميوزيكلي ، والقنوات بتاع يوتيوب اللي بتنشر الميوزيكلي ، وصفحات الفيس اللي بتتكلم وبتنشر الميوزيكلي ، والعيال اللي بينشروا على الميوزكلي . .
اتقوا ربنا وابعدوا ولادكوا عن كل الكم المقرف القذر من الحاجات دي . .
من فترة بسيطة عرفت إن فلان اللي في سادسة إبتدائي بيتفرج على أفلام إباحية وبيدخل يدور عليها في التليفونات ، ومن فترة قبلها كان في بنت صغيرة عرفت إنها بتتكلم على الآب والآبن والروح القدس وهي أبوها وأمها مسلمين بس ده لإنها شافت الحاجات دي في أفلام كارتونية كده مسيحية معمولة للأطفال وخد عندك بقى مواويل علشان تصلح فكرة غلط اتزرعت جو عقل طفلة ولما تكبر وتقولك بابا يسوع متبقاش تقعد تلطم بقى . .
قولنا وبنقول أدنى حد من العلم مش كافي لكـن مهم في التربية ، مهم علشان تعرف أنت بتتعامل مع إيه ، والإسفنجة اللي قدامك دي هتشرب إيه ولا إيه . .
مفيش عاقل يحط قدام ولاده إنترنت وتابلت ولا موبايل ويسيبهم قاعدين قدامه طول النهار بدعوى إنه مشغول وبيجيبلهم فلوس والجو ده ، طبعًا أنت مجبر إنك تشتغل وتجيب فلوس وكل الكلام ده بس إيه جدوى اللي أنت بتعمله ده لو أنت بتربي طفل شارب ثقافة مهببة بالهباب
المختصين بيقولوا للناس متسيبوش ولادكوا قدام التلفزيون وطيور الجنة ساعات طويلة وهما في سن صغيرة لإن تأثير الشاشات دي على إصابة الأطفال بالتوحد معروفة لكـن إحنا دلوقتي بنعمل حاجة ألذ بكتير جدًا وهي إنك تسيبلهم الموبايل ويقعدوا قدامه بالساعات ويمكن أنت أصلًا متعرفش تتابع هي العيال دي بتشوف إيه . . وبعد كده لما يكبروا شوية ترجع تعيط .
المنع مش حل ، لكـن في نفس الوقت السيولة اللي الناس عايشة فيها دي لا توحي بخير أبدًا، ألف باء يعني إنك تبقى مدرك طفلك بيعمل إيه وبيشوف إيه وتبقى مفلتر كل الكلام ده ، ألف باء إنه يتمنع من مشاهدة الحاجات دي في السنين الاولى ، وبعد كده تبقى أنت عارف هو بيعمل إيه لحد ما يكبر شوية . .
طبعًا كل اللي أنت هتعمله مش هيحميه ولا حاجة ، لإنه شوية بشوية هيدخل المدرسة وإذا كنت أنت ربيت عيالك كويس فهيختلطوا بعيال تانية أكيد فيهم عيال متربتش وربما يكون أهاليهم كمان كده ودي مش شتيمة . .
وفي مرحلة المراهقة اللي بعض الناس اللي مش واصلهم الفكرة وبيفهموا الكلام غلط هيقولولك إن سن المراهقة غير حتمي والكلام ده ، لا يا حبيبي في المجتمع المقفول ده أكيد السن حتمي ، إحنا هنا مش عايشين في مجاهل إفريقية ف إن شاء الله لما ابنك ولا بنتك تبقى في مرحلة المراهقة وتبدأ تسمع كلام أصحابها أكتر من كلام أهلها ، ولما تختلط ببيئة سايبة خالص هتبقى أنت وأفكارك وعاداتك بالنسبالها حاجة مش لطيفة والتزامها ليك هيبقى أقل بكتير وطبعًا الولاد في النقطة دي أشرس بكتير من البنات ، يمكن السيطرة على البنات بشكل أكبر ، لكـن الولاد بيعايروا بعض ب مين والده متحكم أكتر وبالتالي ممكن في الفترة دي الطفل يكرهك بسهولة خالص وكل دي تراكمات .. مفيش حاجة بتعدي على عقل الطفل بتفون كده وخلاص . .
فأنت دورك إنك مش تحميه لإنه كده كده هيتصاب ، بس دورك إنك تقدمله دعم قبلي ، تفهمه اللي هيحصل من بدري ، وتبقى مصاحبه وواقف جمبه بحيث تقدروا تسيطروا سوا لو حصل حاجة .
الحاجة التانية إنه يعرف الحاجات دي متأخر شوية ، يعني يبدأ يعرف الحاجات دي وهو أكبر شوية يبقى أنت أخدت فترة قدرت تديله مصل يحميه ولو لفترة من الوقت ، إنما السايب في السايب من بدري كده . . ده حرام عليك .
ومتنساش تولع في الميوزيكلي ، ولو قابلت حد من العيال اللي تشك إنهم رجالة اللي حاطين روج وعمالين يبينوا الغمازات ويتمايصوا دول مسي على قفاه بقلمين كده .
إرسال تعليق