من أعجب الجمل اللي بشوفها كتير في الفترة الأخيرة مع البوستات الطويلة شوية ، أو المقتطفات اللي بناخدها من دورات البشهندس تعليق حد بيشير البوست أو الفيديو ويكتب " طويل بس يستحق " ، أو كلام من نوعية " هو طويل بس مفيد جدًا "
وكأن مجرد طول البوست أو الفيديو ده في حد ذاته عيب ، وبالتالي هتلاقي الناس دايمًا حريصة إنها تقصر بوستاتها وكذلك عامل مهم من عوامل إن الفيديو بتاعك ينجح إن الفيديو يكون قصير والموضوع لو مقتصر على الهلس والكلام الفارغ كان بقى كويس ،
لكـن الناس معندهاش مشكلة أبدًأ إنها تشوف فلوج تتفرج فيه على واحد بيفتح باب بيتهم وبيمسك الكاميرا طول الوقت يصور الشارع ويصور نفسه وهو بيركب العربية ويحاول يضيف المرح إلى الغذاء عن طريق إنه يتحفنا في نهاية الفيديو بالقيمة اللي المفروض نستخرجها في يومنا أو أي هبل من النوعيات دي - وأنا فاهم جدًا إن ده بدافع الفضول ، وإن في لذة بيحسها بعض أو كتير من الناس في إنهم يشوفوا يوميات شخص معين ومش ده اللي أنا بتكلم فيه - لكن إنه يبقى في فيديو مفيد ومهم وطبيعي يكون طويل لا ده شيء مش مرغوب فيه عند الناس بدعوى إن الملل بيصيب الناس بسرعة ، وإنه الفيس بوك مش منصة تعليمية بل منصة ترفيهية وكبر دماغك وشغل مخك واضحك كده إحنا في رحلة .
ويمكن الأثر ده من الحاجات اللي ساهم الفيس بوك بشكل كبير في تنميتها وزيادتها وإن كان مش هو السبب في خلقها ولكن النمط ده متكرر بشكل كبير جدًا . .
ولذلك في درر وكنوز ولكـن للأسف محدش مهتم إنه يشوفها لإنها طويلة جدًا يعني إزاي هتشوف فيديو 16 حلقة ولا 24 حلقة الحلقة ممكن تكون ساعتين ولا تلاتة ، لا طبعًا أنت تشوف خمس دقايق بس هنا ولا هناك وهتبقى مثقف وجميل وضيعت وقت لطيف بدون م تشعر بالذنب . .
والكارثة الكبيرة إنه الكورسات نفسها تبقى بالمنظر ده في منصات الموكس ، فتلاقي إن الكورس اللي المفروض يتاخد على بعضه مثلاً أو يتقسم لفيديوهات قصيرة مدتها ربع ساعة نص ساعة بيوصل إن في بعض الكورسات بتبقى دقايق ( زي منصة إدلال مثلاً ) وبتطلع من الكورس مستفدتش أي شيء وهنا بتلاقي صوت عادل إمام بيتجلى في ودنك وهو بيقول " بلد بتاع شهادات صحيح "
أو كلام د. أحمد خالد توفيق " في مصر ليس المهم أن تكون المهم أن تبدو " .
ودي مصيبة تانية بتضاف لمصيبة إن الناس بتبدأ الحاجة ومتكملهاش أصلًا ف إحنا عندنا رقم كبير جدًا بيُفقد لمجرد إن الفيديو طويل ، ورقم تاني من الناس اللي قدرت تتغلب على ده وشافت الفيديو فعًلا ولكنها مش بتكمل ف لو بتاخد كورس مثلاً بص على حلقة البداية بتاع الكورس اللي ممكن تلاقيها بتوصل ل 100 ألف مشاهدة والمحاضرة الأخيرة ممكن تلاقيها بتوصل ب 2000 مشاهدة وتقعد تتعجب على الناس اللي خدت فكرة في نص ساعة ومقدرتش إنها تكمل .
الموضوع طويل والحالة من سيء لأسوأ ما شاء الله ، اقفوا مع نفسكوا شوية وشوفوا إزاي بيأثر عليكم النمط العام للفيس بوك والانترنت .
اتكلمت عن ده بشكل أكبر في حلقة " طريقك للفشل بدون معلم " موجودة ع اليوتيوب .
إرسال تعليق