أكثر من مرة بقول إني بعتبر الأفلام عمومًا والسينما والمسلسلات من مكوناتي الثقافية فالناس بتعترض عليا وده عادي زي ما وضحنا أكثر من مرة ، في ناس بتعترض بإنها تسب ، وفي ناس بتعترض بإنها تعمل هاها على الكومنت وفي ناس بتعترض بإنها تسألك وتحسن الظن بيك حتى لو أنت مش أهل ل ده فلهم جميعًا ده بوست سريع كده عن الموضوع كان مكتوب ف كومنت ردًا على السؤال وقولت أنشره ربما يوضح بعض من وجهة النظر لحد ما تيجي فرصة تانية لشيء مبسوط أكتر وربنا يرحمنا كلنا .
في حاجات كتير الحقيقة تقول وتحدد مدى الاستفادة اللي بنحصل عليها من الأفلام والمسلسلات أهمها هو السؤال عن مقدار الاستفادة بعد الفيلم !
في أفلام كتير بتورثك قيمة وبتفتح سكك كتير للمعرفة . .
منها مثلًا على سبيل المثال فيلم زي " 12 angry men "
ملخص الفيلم قيمة واحدة هي قيمة " الشك " .
أو زي ما قال سيدنا نقلًا عن ديكارت ينبغي أن تشك في كل معلومة تعرفها ولو مرة واحدة ، الفيلم بيأكدلك على الفكرة دي في خلال مدة وجيزة وده شيء عظيم جدًا .
كذلك فيلم مثلًا زي " 3 idiot " الفيلم فيه قيمة بتتحدد من وراه ومن بعض الأفكار في الحديث عن فكرة التعليم بين المنظومات والشغف وده يتكتب فيه كتب كاملة الفيلم اختصرها بمفاهيم حية جدًا وشوتات كده أبسطها عظيم .
فيلم زي " PK " واللي بيتكلم عن العلاقة بين الدين والإله ورجال الدين . .
وهكذا ف الأفلام دي فيها قيمة مباشرة جدًا يمكن استخلاصها بسهولة .
من ضمن الأفلام دي برضه أفلام الأنيميشن ..
يعني مثلًا فيلم زي " inside out "
الفيلم مقدم للأطفال لكن في نهاية الفيلم الواحد بيتمنى إن كل الأفلام تكون معده ومقدمه للأطفال من الجمال اللي فيه واللي بيتكلم فيه عن المشاعر الإنسانية زي السعادة ، والخوف ، والغضب ، والتقزز ، وغيرها . .
اللي في النهاية بيرسخ قيمة ما .
لكـن هنا إضافة إلى القيمة يمكن إنه يكون فيلم عائلي نشوفه سوا كده وده في حد ذاته قيمة ، إني أجمع أبويا وأمي وأخواتي ونقعد نتفرج على حاجة كده طب والله أحلى عظمة .
ولو عندي أولاد صغيرين كمان ونقعد نتفرج مع شوية فشار كده وشاشة نضيفة وعاملين شوية عصير طبيعي عظمة يعني .
نفس الكلام عن فيلم " ugly dolls" واللي قيمته عبقرية ، نفس الكلام عن أفلام كتير جدًا تندرج كلها تحت القيمتين دول .
قيمة مباشرة باخدها من الفيلم +- صلاحية الفيلم للمشاهدة العائلية في جو أسري مفعم بالمشروبات الطبيعية اللذيذة .
كذلك في نوع من الأفلام وهو الأفلام الوثائقية وطبعًا دي قيمة مباشرة برضه ، والأفلام الوثائقية اللي عندنا هنا غير الأفلام الوثائقية اللي بتتعمل في صورة أفلام عادية وفي كتاب لطيف أوي في الحوار ده اسمه الأفلام الوثائقية مقدمة قصيرة جدًا ممكن ترجعله .
وهنا يستحسن إننا نفصل ( بالمصري ) الحديث بسؤال هل الأفلام الوثائقية أو الأفلام عمومًا ليها قيمة مساوية للكتب أو تفوقها ؟ هل يمكن صنع ثقافة بدون الكتب ؟
طبعًا وحتمًا وقولًا واحدًا لا ، في فرق كبير ما بين إنك تكون دماغك حلوة ، منطقك سليم حتى لو أنت مش قارئ قوي أو مشاهد قوي ، وبين كونك قارئ .
يعني قولًا واحدًا كده لا شيء يفوق الخبرة لا شيء يفوق كارير .
ده أمر منتهي أكتر من كريستيانو والله .
بس القراءة ليها مدى وحد ، يعني في حاجات أحيانًا بتتضح بشكل أفضل من الوثائقيات ، بتشوف قدامك حاجات حقيقية ، بتختصرلك كتب وهكذا ، يعني مثلًا تقعد تقرأ كتاب 90 مليون صفحة بأسلوب معقد بيقولك مين هو محمود شاكر ، ولا في أقل من 60 دقيقة من عمرك تكون عرفته ولما تيجي تقراله أو تقرأ عنه تبقى فاهم مين ده وبيقول إيه وجاي هنا في دماغك بيعمل إيه ؟ فهي بتنجز حاجات وبتثبت حاجات وهكذا .
بس في حد كده الإنسان بيبدأ بعدها يخرف . .
يعني أنت هتذاكر 6 ساعات - يا إلهي ، يا سلام يا عمو د أنت قوي بشكل - طبعًا مذاكرتك أول ساعة بتبقى يعني هه لسه بتقوم كده ، مذاكرتك آخر ساعة بتبقى بتجيب آخرك ف بدل ما تضيع وقتك في آخر ساعة في إنك تجبر نفسك إنك تكمل بنقول إيه طب ما تخلي الساعة دي كده تغيير جو ونشاط وبتاع بحيث لما ترجع للقراءة تبقى راجع فايق . .
أهو بالظبط كده ممكن تكون الأفلام دي ، ممكن تعتبرها طريقة أخرى للثقافة وأنت مبتضيعش وقت ، يعني مبترميش مجهود في أرض بور ، بتاخد معلومات ، وبتفهم حاجة ، وبتبقى متابع ومطلع في ذات الوقت واللحظة اللي أنت بتفصل فيها من القراءة علشان تاخد قفزة أقوى .
طب إذا كان ده هينطبق على الأفلام اللي ذكرتها إيه جدوى فيلم كوميدي مفيهوش الفكرة اللي أنت بتقول عليها دي ، أو جدوى فيلم آكشن لا فكرة ولا نيلة .
صراحة أنا بخاف من أي إنسان بيشوف أي شيء وبيطلع منه بدون فكرة ، يعني بعتبرها فكرة غير ممكنة الوجود ، يعني لو أنا شوفت شيء فاكس فأنا عرفت إنه الشيء ده فاكس ريللي ريلي اتس معلومة ! ، فلما هشوف حد عايش جمبي في الكون بيقول بيبول واتش زات هقوله يا حاج أنا جايلك من المستقبل وبقولك بلاش نقطة
ولذلك لما اتكلمت عن قاعدة الصفر أكبر من سالب واحد مكنتش بقولك إن قيمة ده صفر لا ، أنا قولت إن ما يبدو ليك صفر أحسن من السالب واحد .
النقطة التانية إن الكوميدي ده ممكن يكون هو سبيلك للخروج من الأزمة اللي أنت فيها ، لو أنت بائس ومكتئب ووحش كده ( مش أنا طبعًا ) وشوفت فيلم كوميدي ياااااه يعني ضحكت ؟ خرجت من المود نص ساعة ؟ طب ما دا بالدنيا يعني .
لما شوفت فيلم " علاء الدين " وشوفت ويل سميث " وهو عامل دور الجني أنا ضحكت فعلًا ضحكت ضحكت يعني ومش عاوز أقول إن ده شيء نادر علشان مبقاش ببالغ بس دي معجزة إني أضحك ضحك فعلًا بسبب المشاهد مش بسبب إن الراجل ظريف ، أو إني فاهم هو بيلقح على إيه واللي حواليا مش فاهمين ف دي قيمة برضه .
أفلام الأكشن كذلك ، إحنا في عصر أسود من السواد أو كما قال الشاعر ولسه اللي جاي أسوووووود ، فأنت بتتعامل مع طلبة ومع ناس متابعين للكلام ده بشكل بشع ، فأنت لو مش متابع هيتلعب بيك الكورة حرفيًا ف في حاجات أنت مضطرلها .
يعني مثلًا أنا لقيت في الفترة الأخيرة إن فئة من الشباب الأصغر سنًا مهتمين أول ب حاجة اسمها بيكي بلايندرز معرفش هي إيه فيلم ولا مسلسل ولا القصة إيه فروحت جيبته وشوفته علشان أفهم العيال دي بتعمل إيه ، والتأثير عليهم هيكون إزاي . .
فمثلًا في إباحية كاملة ، ومشاهد سواد في المسلسل ، ف بقيت عارف إنه ده بقى عادي عند الشباب دول ، مش إنهم يشوفوا م كله بيشوف من زمان ، لكـن إن ده يبقى مطعم في شكل مسلسل ف ميتقالش عليه إباحية ، وأنت تبقى مش كول لو متعرفوش ، إنما لو فاهم هتقفش الكوكب براحتك .
نفس الكلام على بابجي أما تحاول تشد حد للثقافة وهو آخره بابجي وأنت بتقوله وأنت عجوز كده ( هيطلع عيل أهبل يقولك عجوز دي بتتقال ل الست ) هي إيه بابجي دي يابني هيبقى منظرك عرة ، لـكن لما تعرفه إنك بتقاوم اللعبة لإنك بتحبها لإنها في النهاية مش مفيدة هيبقى إحساسه مختلف ف في بعض الناس مجبورين بشكل أو بآخر إنهم يشوفوا جون ويك ، وغيره علشان تكون متابع .
طبعًا ده كله كوم وكون إن الحاجات دي مشهورة جدًا كوم تاني خالص ، كون إنها مبهرة وبتشد الناس وبتشدك معاهم شيء تاني ، كون إنها أصلًا محببة جدًا للنفس ف أنت بتحبها زي ما باقي الناس بيحبوها ده شيء تاني خالص .
يعني نقدر نقول إن ده شيء سريع كده لأهمية الأفلام دي لحد ما يبقى عندنا شيء نقدر نفصل فيه ونتعمق أكثر .
طبعًا لا يخفى على حد إن الإباحية في الحاجات مرعبة ، يعني مشاهد كاملة دقيقة ودقيقتين بشكل فج جدًا وأنا اتكلمت عن ده في حلقة على اليوتيوب تقدروا ترجعولها .
وأنا بحاول في ترشيحاتي عمومًا إنها تكون خالية بالقدر الممكن من الكلام ده ، يعني فيلم ملوش مثيل في الحديث عن المفاهيم النبيلة للبوذية ولكن فيه مشهدين أزبل من بعض لكـن مفيش حل تاني .
تعليق: السينما وسيلة عظيمة من مصادر الثقافة، وسيلة للعيش والخروج من نمط الثقافة السائد، والوصول إلى أفكار أجمل وأعظم، عد بالزمن إلى السبعينات، شوف نوعيات الروايات المقدمة للجمهور، شوف القمم العظيمة الموجودة في مصر، شوف أفلام الوقت ده مع وضع إباحيتها في الاعتبار، لكـن انظر للأفلام وتمعن في كتاب السيناريو، هتعرف إننا عايشين في زمن المسخ، والسينما وسيلة لخلق عالم، عالم أجمل من العالم الحالي.
❤❤❤
رد على التعليقحذف التعليق