حكايات حارتنا.. متتاليات سردية مدهشة في حارة محفوظ

- في إندومي ؟
= لا والله مفيش .
- طيب . . مش هتجيبوا إندومي ؟
= لا والله عندي أطفال صغيرين فـ محبش إنهم ياكلوه .
- همهمت ، ابتسمت ، شكرته .

كل اللي كان في بالي في الوقت ده إن النية الصالحة وحدها لا تكفي ، الموقف بسيط لكنه مرتبط بمواقف واحداث كثيرة جدًا . . النية الصالحة وحدها لا تكفي .

نبدأ من الموقف لبعيد ولا من بعيد للموقف ؟ خلونا من بعيد الأول . .

التربية عملية شاقة جدًا ، عملية عسيرة وبتطلب وقت كبير جدًا ومجهود ذهني ونفسي كبير ، وتضحيات كبيرة جدًا للوصول للهدف والله أعلم إيه اللي هيطلع معاك في الآخر ، بعض الناس بيظنوا إنهم هيبقوا أزواج كويسين . . طب يابني أنت بتطيق حد يلازمك لفترة ؟ لا ، طب هل أنت بتحب حد لدرجة إنك تحس إن قعدتك معاه لساعات طويلة مش ممل ؟ لا ، طيب أنت أخواتك الصغيرين دول بتستحملهم يعني ؟ لا بيعيطوا ويقرفوني وجو كده ، طيب يابني أنت رايح تتجوز علشان تهبب إيه ؟ لا منا هبقى زوج صالح ، أنا حاسس إني هبقى كده . . شيء غريب ومريب جدًا .

التربية مش عملية حسابية 1+1=2 ، أولًا أنت كل النصائح والمعلومات والأفكار التربوية دي أنت ممكن تكون جاهل بيها تمامًا ، ولو مش جاهل بيها ووصلتك فهي مش كلها هتكون صحيحة ، ف قدرتك على تجميع الواحد زائد واحد دي نفسها مش هتكون بيرفكت ولا حاجة وهتعك كتير جدًا ده لو افترضنا يعني إنك مش مؤمن إنك سوبرمان الطيب اللي هيبقى فل بدون أي شيء كده ، ثم النقطة التانية إنك لو عملت كل الواحد + واحد ده الله أعلم هيطلع معاك كام ، ممكن ميطلعش ، وممكن يطلع أكثر وممكن يطلع أقل الأمر مش مضمون خالص.

كمان أنت لما بتربي طفلك بتربيه على قيمك ، ومعاييرك ، ومعايير الدين اللي أنت منتمي ليه ده برضو على افتراض يعني أنك واصلك حوار الدين والكلام ده فأنت في الحالة دي عندك حاجات ثابتة أينعم ولكـن عندك مليون متغير في الواقع وحرصك على إن أطفالك يبقوا كويسن مش معناه إن كل سعيك هيخليهم كويسين .

معلوماتك وأفكارك اللي في الغالب يعني في الغالب مغلوطة ومش مظبوطة ولا متماشية مع الواقع دي ممكن تخليك تعمل حاجات كتير جدًا تكون هي المساهم الأول في فساد الحاج اللي أنت مخلفه ومطلعه للمجتمع ده .

يعني لو أنت كنت مدرك تمامًا المجتمع اللي بره ده عامل إزاي وخايف عليه من التعامل مع الناس وعمال تخبي فيه ممكن الشخص ده يطلع إنعزالي لدرجة غير ممكنة ، وممكن لما ينفتح على العالم ويشوف أصحابه اللي أنت طبعًا مش هتعرف تتحكم فيهم يفسدوه تمامًا ويحولوه لمسخ أنت نفسك متعرفش هو حصله كده إزاي .

لو أنت بتحبه زيادة عن اللزوم وحبك ده مخليك خايف عليه ومش عاوزه يتعب في أي حاجة الطفل ده ممكن يطلع اعتمادي بدرجة كبيرة جدًا لدرجة إنه هيطلع نيلة لا يعتمد عليه في أي شيء ولما يتجوز ده هيجيب واحدة يعذبها معاه بعد كده .

ممكن لو أنت مبتعرفوش إيه الصح وإيه الغلط بحجة إنه صغير لسه أو غيره ودايمًا بتحامي عنه وتعرفه إنه صح يطلع فاكر نفسه صح في كل حاجة والناس كلها مش فاهمة وهو علامة أهل الأرض وده حتى مش بعلم إنما بجهل .

وده الأثر بتاع النية الصالحة أنا متكلمتش خالص على الأثر اللي الناحية التانية . .
متكلمتش خالص على الضرب المبالغ فيه ، ولا الإهانة المتعمدة ، ولا القسوة اللي تطلعه أشر واحد في الدنيا ، ولا المواقف المتراكمة اللي هتخليه يطلع متقوقع حوالين نفسه ولا العقد النفسية اللي هتولدهاله من سلوكك معاه ومع أمه ومع اخواته ، ولا تمييزك ما بينه وبين أخواته ، ولا سلوكك المشين اللي يخليه تسقط من عينه كل الحاجات اللي ممكن يعملها صح ، ولو ربنا تاب عليه وأدرك أمراضه دي وحاول يحلها فهي كارثة تانية ومعاناة هيموت وهو بيحاول يتخلص منها ده كله أنا مبتكلمش عليه د أنا بتكلم لسه عن الأثر السيء للنية الصالحة.

المنع والقهر والحرمان اللي بتمارسهم بدعوى إنك عاوزه يطلع ناشف ويستحمل ويسترجل هتفقده قدرته على التمميز ، واوعى تفتكر إن الإنسان لما يبقى جريمته في الحياة أنه اتولد لأب وأم مش متربيين كويس هيبقى حلو بالعكس ده كل حلوله فيها مشكلة ، مشكلة إنه ميقدرش يعلن إنه بيكره أبوه وأمه مثلًا ، ولو كرههم وقال للناس إنه كرههم لا تظن إنه ده مبيجرحش كرامته وقيمته لحد ما يوصله لحاله من اللامبالاة .

معلومة خطأ عن الإندومي ، بكرة تبقى معلومة خطأ عن اللبس ، بعده تبقى معلومة خطأ عن الخروج ، تبقى معلومة خطأ إنه يشيل تليفون ، وإنه يفتح انترنت ، وتبدأ العلاقة ما بينكوا تبقى علاقة من طرف واحد بيخاف وواحد قرفان من كتر خوف التاني .

الإندومي ملوش أضرار لو اتاكل بإعتدال والمادة اللي في الإندوي هي نفس المادة اللي في كل حاجة بتشتريها ف مش حوار ، ولكـن ليه منا بدل ما أعرف وأفهم وأركز وأتعلم علشان العيال دي أعمل حل أسهل وأسرع وآمن أكتر . . أمنع كل حاجة ، الغي كل حاجة ، أقفل كل تيار ، وأسد الباب اللي هييجي منه الريح ، واللي ممكن ييجي منه الريح ، واللي مش هييجي منه الريح وينتهي الأمر وطلعولنا أمراض نفسية زيادة تتفاعل مع الأمراض الموجودة وتعمل خلطبيطة بالزفت على دماغنا كلنا .

نيتك الصالحة دي تلفها في ساندوتش وتاكلها وترحم الكوكب..
لو مكنتش جدير بإنك تفضل تتعلم وتقبل إنك تغير من نفسك علشان الطفل اللي هتجيبه ده ف متتحرقش تتجوز .