من الأسئلة اللي بتوصلني كتير جدًا سؤال يمكن تلخيصه في :-
" أنا معدل إنجازي اليومي قليل جدًا ، ببدأ في حاجات كتير ومبكملهاش ، وبقول على حاجات كتير ومبعملهاش ، عندي اهتمامات كتير جدًا ، والعلوم كتير جدًا ، وشغفي كبير جدًا ناحية حاجات كتير ولكـن الشغف ده مش بيكمل يمكن بياخد يومين تلاتة أسبوع وأحيانًا أقل ، أحيانًا بفكر في الفكرة بالليل والصبح بتكون اتطفت أمشي شوية وبعدين أفوت يوم ولا اتنين فأرجع مرة تانية وابدأ من الأول تاني وساعات أقف خالص ومتضايق جدًا وده مسببلي أزمة بس مش عارف أتعامل مع ده إزاي "
وإجابة السؤال ده بالكلام بسيطة ، ولكـنها بالفعل محتاجة مجهود كبير جدًا ..
- كل تغيير في النفس هو تغيير صعب جدًا وخاصة لو كان تغيير من الأعلى للأقل ، يعني لو أنت مبتشربش سجاير وهتشرب سجاير ممكن العادة دي تتبني معاك في خلال يومين بإذن الله ، لكـن لو على العكس بتحاول إنك تبني عادة جيدة زي إنك تتوقف عن عادة سيئة وهي إنك تبطل السجاير فده هياخد منك وقت ومجهود كبير .
- البيئة اللي حواليك بتسيطر عليك بشكل كبيـر جدًا ، يعني لو البيئة اللي أنت فيها من ناحية الإنجاز والمجهود وغيره بيئة قوية ف وصولك لنفس اللي هما فيه هيكون أسهل في الغالب من إنك تكون في بيئة سيئة أوملهاش علاقة بالكلام ده خالص .
- مفيش خطة هترسملك خط مستقيم من هنا لحد نهاية الطريق ( انسـي )
الخطط معمولة علشان يتم كسرها بطريقة أو بأخرى ، في كل الحالات هي هتكسر ولكـن كسر عن كسر يفرق ، أما تكسرها علشان تعدل فيها غير تمامًا إنك تكسرها علشان هتتوقف عنها .
الخطط معمولة علشان يتم كسرها بطريقة أو بأخرى ، في كل الحالات هي هتكسر ولكـن كسر عن كسر يفرق ، أما تكسرها علشان تعدل فيها غير تمامًا إنك تكسرها علشان هتتوقف عنها .
- كتر المحاولات وإن كانت ممكن تخليك محبط شوية وعندك ذاكرة سلبية عن الشيء إلا إنها في نفس الوقت هي الضمان الوحيد إنك تطور من نفسك وتتحسن وتبقى أفضل ، كل مرة بتقف فيها وبتقرر إنك هتكمل ( مع وجود أساس تعدل فيه ) ده ضمان إنك المرة اللي بعدها هتبقى أفضل وده في حد ذاته قدر كبير من النجاح مش كل الناس بتقدر تسلكه ، في ناس تبقى ماشية في طريق وأول ما يتحط قدامها عائق تلاقيها قالتلك الطريق ده مش بتاعي ، أنا مش لاقي شغفي ، أنا هدور على شغفي في حتة تانية ، أو تقول إنها أصلًا فاشلة والأفضل إنها تتوقف ( عجز مكتسب ) .
- أنت مش مطلوب منك أكتر من اللي أنت تقدر تعمله ، مش مطلوب منك تكون تنين مجنح ، مش مطلوب منك تبقى أيرون مان ( باعتباره هو الأجمد على الإطلاق ) ، مش مطلوب منك إنك تقرأ كل الكتب ، ولا تعرف كل التخصصات ، ولا متنامش يوميًا ..
مش بس مش مطلوب منك ده فعليًا مش هيحصل ، ده مستحيل إنه يحصل ، حاول تتغلب على النقطة دي لو أنت متعدد الاهتمامات .
- في فرق كبير بين معرفتك للمعلومة وتطبيقك ليها . . ، فرق شاسع ، فرق شاسع بين المعرفة النظرية بما يجب أن تفعله ، وما تفعله ، كل القصة في إزاي تقلل الفجوة بين الاتنين لكـن إنك تقضي عليها ده في الغالب مش هيحصل ، ومش هتعرف تعمله .
- أقلم نفسك على إن الحاجات اللي أنت عاوزها أكبر بكتير جدًا من كل اللي أنت هتقدر تعمله ، أقلم نفسك إنه وإن كان سقف الممكن مذهل إلا إنك عمرك ما هتقدر تستوفيه ، ومش مطلوب أصلًا .
- أقلم نفسك إنك في ماراثون ، مطلوب منك تفضل تجري لحد آخر لحظة ف انسى خالص فكرة إنك تموت نفسك في أول عشرين متر دول علشان هتهنج في أول ربع ساعة.
- عود نفسك إن مفيش نهاية ، النهاية مفتوحة تمامًا يعني متقعدش تدور على النقطة اللي أنت هتبقى فيها أفضل نسخة ممكنة منك لإن مفيش أفضل نسخة ممكنة منك ، في أفضل نسخة ممكنة منك في الوقت الحالي تبعًا لمعطيات الواقع وظروفه وده اللي أنت بتحاول توصلها ، وفي نفس الوقت الطريق نفسه لا منتهي وكله تحديات بتزيد أحيانًا وتقل أحيانًا لكنها لا تتوقف .
- عرف نفسك إنك مش هتغير العالم ، وإن دي أفكار بتجيلنا كلنا وإحنا صغيرين وبعدين بنتنازل عنها أول بأول لما نعرف إننا مش عارفين نغير نقطتين في نفسنا بس مش كل اللي مش عاجبنا ، لو غيرت نفسك ف أنت غيرت العالم ، تغييرك مش مهم للعالم ، مش ملموس ، العالم مش هيحتفل بيك مش مهم أنت مش مستني ده أصلًا .
- إنك تجري مهم جدًا ، بس لو مشيت مش وحش ، ولو مشيت بتعرج مش وحش ، ولو بتحبي مش وحش ، ولو بتحاول تحبي مش وحش ، ولو ملزوق في السرير مش وحش لو أنت بتحاول تقوم ، الفكرة كلها إنك أنت اللي هتقدر تقيم ده ، واحد في إيده يبقى عالم ويضيف شيء البشرية تنتفع بيه لكـنه اختار إنه ياخد شهادته ويشتغل في مستشفى جمبه وانتهى الأمر . . ممكن يتشهر ويبقى حلو وجميل بس لو أنت إمكانياتك أعلى من كده فأنت هتبقى محسور حتى لو الناس بتحسدك ، أنت المعيار لإن أنت اللي عارف أنت فين.
- أنت محتاج دايمًا تفكر في نفسك أزيد ما تفكر في الناس ، تركز في الأخطاء بتاعك أنت ، في الطموحات بتاعك أنت ، في الأفكار بتاعك أنت ، أوعى تبص لواحد جمبك في سندوتش الهامبرجر اللي معاه ، ظروفك غير ظروفه ، واحتياجاتك غير احتياجاته ، وقدراتك غير قدراته ، واللي أنت ميسر له غيره ، وتكلفتك مش زيه ، وحسابك مش زيه ، بتحقد عليه ليه ؟ أو بتحسده ليه ؟ وبتشتت نفسك ليه ؟
صارح نفسك إنك بتحقد على فلان واستعر منها هتلاقي نفسك واحدة في واحدة بتقاوم البلاء اللي إحنا فيه وعلى الأقل ما بتحبش الشر للناس ، مبتحبش الأستاذ يموت علشان ميمتحنكش زي ما كنا بنشعر زمان ، مبتحبش إن الواد اللي سابقك يحصله ظروف ف ميكملش ف تكسب أنت ، متحبش إنك تخبي معلومة على صاحبك علشان هو هيطلع ويسبقك الحياة مش بتتقاس ب ده ، حبك الخير للناس شيء مفيد لك ولنفسيتك وانسانيتك وإحساسك أكتر من أي حد .
- ضميرك لو بينقح عليك فاعرف إنه عمره ما هيريحك ، هيفضل يتعبك بأشكال مختلفة ، مرة يحسسك إنك قليل ، مرة يحسسك إنك مش بتعمل اللي عليك ، مرة يقنعك إنك تتوقف علشان أنت فاشل ، مرة هيقنعك أنك بتعمل حاجات كتير وحشة ف وقف كل حاجة حلوة أنت مش أهل ل ده . . ده في الغالب شيطانك ، ونفسك قبل ما يكون أي حاجة تانية ، قاوم ، وزاحم ، واعرف إنك لا اتخلقت كامل ، ولا هتبقى كامل ، ولو فاكر نفسك إله وبتعتقد في نفسك ده فحاول تتوقف ، أنت عبد ومهمتك السعي والمقاومة .
- اعرف إن تشتتك هيفضل موجود ، مش هتيجي في الغالب اللحظة اللي تاكل فيها بأمان ، وتتفسح ، وتخرج وأنت كل حاجة عندك زي الفل ، مش حد هيكلمك ف تفضل تقوله أنا سعيد يا هاني لمدة يومين ورا بعض ، السعادة نفسها موضوع مربك جدًا . .
لو أنت حققت كل أحلامك فسعادتك هتفضل بعدها لمدة قد إيه ؟ ده موضوع مهم جدًا ، أنا كان نفسي أطلع الأول في فترة ما ، وطلعت ، كان نفسي انتصر في معركة كنت مظلوم فيها جدًا ومجبور على قبول الظلم وربنا نصرني ، بعد يوم من شعور الانتصار بقى جوايا لكنه خلص ، ولو فضلت أقول أنا انتصرت كل ما أقابل واحد فيجب عليا إني أقابل دكتور نفسي ، أنت في عملية مستمرة متوقفش ومتدورش على السعادة والراحة والكلام ده .
- الإنجاز مش مجرد إنك قرأت كتاب وشوفت محاضرة ، إحسانك للناس أجمل إنجاز ، أجمل إنجاز مش مهم تكتبه للناس ، مهم توثقه لنفسك ، إنك تفرح أخواتك بالدنيا ، أكله حلوة مع حد بتحبه إنجاز ، كبح جماحك في شيء ما إنجاز ، مقاومة إكتئابك إنجاز ، حاجات كتير متتكتبش ، حاجات كتير مينفعش تسميها تضييع وقت ومينفعش تكتبها هي إنجازات ، عدم فعلك لشيء وحش أو تقليلك له إنجاز ، إنجاز وأنت لسه منتقلتش لإنك تعمل شيء حلو .
- ندخل في الموضوع ؟ ندخل في الموضوع ، بس الأهم من الموضوع الكلام اللي قبل الموضوع فركز فيه كويس جدًا ، وهنضيف عليه تاني مرة تانية .
- أول إضافة إن التراكم مفيد ، فشلك المتكرر ده أحيانًا يكون جميل ومفيد لكـن ممكن في النهاية يفكرك إنك استفدت بكلام فلان بس وفلان ده هو اللي خلاك أسطورة لكـن ده في الغالب بيبقى وهم ش أكتر ، كل حدث أنت مريت بيه ربما يكون مطلوب ، يعني ربما فشلك في س وص وع يخليك خبير فيهم فمتظنش إنك علشان اتشرحلك الدرس 3 مرات إنك فهمته علشان آخر شخص شرحهولك جزء من فهمك للدرس هو عدم فهمك للدرس مرتين ( وده لا يعني إن المدرس الأخير معملش حاجة ) .
- أحيانًا أنت بتكون غير مؤهل حاليًا لقبول النصيحة ف متقعدش تجلد نفسك كل شوية ، حاول بس ، حاول مرة تاية بنفس النصيحة ، استوفي النصيحة كويس علشان تقدر تختبر مدى قوتها ، افهم الشيء بعمق وفرغ جزء من وقتك للوصول له يعني متقولش منفعتش معايا جربها كويس وقول منفعتش معايا ، أو قول إنها وحشة حتى .
- ادخل في الموضوع وبعدين اقف واسأل ، كأنك بتدو على بيت الحاج محمود ، متقعدش تسأل كل واحد معدي ربما يكون هو مش مهتم بالحاج محمود ، أو مهتم وميعرفش ، أو مهتم عارف ومش عاوز يقولك علشان مبيحبكش ، أو حالته النفسية دلوقتي مش تمام ، أو سؤالك واسع لدرجة إنك محتاج كل اللي في كوكب الأرض ييجوا يكلموك فيه ..
ادخل في الموضوع واسأل وده ملوش علاقة بإنك تسأل ناس مختصين فيختصروا عليك الطريق هما بالفعل هيختصروا وده مهم بس متعيش عمرك كله بتسأل ، يا أخي لما تدخل وتجرب وتفشل بيبقى عندك سؤال ، بيبقى عندك مشكلة حقيقية ممكن نتكلم فيها
إنما أنا نايم على السرير وبكلم شيخ والنبي يا شيخ يا جميل أنا حاولت أوصل للقمر من حلوان ومعرفتش . . ممكن تقولي تذكرة ليبيا بكام لو رايح من المطبخ ؟ وهل ينفع آخد حد معايا ولا ممنوع التدخين ؟
وتبعت الرسالة فالشيخ يبقى هيتهبل هو إيه علاقته ب ده أصلًا ، وأنت مين يابني ، ويترد عليك إزاي ، ده بالظبط اللي بيوصل للشخص اللي بتسأله لو معندكش سؤال حقيقي مبني على مشكلة حقيقية مش قاعد وبتبعت رسالة للعالم من عندك .
ندخل في الموضوع بقى ؟ ولا نضيف كمان ؟ زهقت مني ؟ أحسن .
- في حاجة تانية مهمة . . لما تعرف أساس ما وجود في العلم متاخدش النموذج كشيء جامد كده هتطبقه زي ما هو وتقول لا فشل معايا ومجبش نتيجة ..
يعني مثلًا في تطبيق اسمه " forest " بيحاول يبعدك عن الموبايل عن طريق إنه بيفضل وقت معين يبني شجرة ولو فتحت التليفون قبل الوقت الشجرة بتتحرق ، التطبيق ده ممكن مينفعش معاك أصلًا لإنك بتفتح من اللاب . .
فأنت بتبدأ تبحث عن شيء بديل أو مساوي لده على اللاب وإلا تبقى أنت استفدت إيه من التطبيق ؟
يعني مثلًا في تطبيق اسمه " forest " بيحاول يبعدك عن الموبايل عن طريق إنه بيفضل وقت معين يبني شجرة ولو فتحت التليفون قبل الوقت الشجرة بتتحرق ، التطبيق ده ممكن مينفعش معاك أصلًا لإنك بتفتح من اللاب . .
فأنت بتبدأ تبحث عن شيء بديل أو مساوي لده على اللاب وإلا تبقى أنت استفدت إيه من التطبيق ؟
مثال تاني في طريقة اسمها برومودورو تكنيك بتقولك على طريقة للمذاكرة عن طريق تقسيم الوقت لجلسات ممكن الجلسة تبقى 25 دق ، طب أنت هتطبق ده مش لازم خالص تلتزم ب 25 دق عيد تشكيل النظام حسب ما يتوافق معاك مش شيء ثابت هو لازم تلتزم بيه علطول ومن هنا دي أهمية النصيحة الجاية .
- اعرف شخصيتك ..
اعرف شخصيتك بالمحاولة مرات ومرات ، بعد كام مرة هتعرف إيه ينفع معاك وإيه لا ، إيه يأثر فيك أكتر ، اعرف نفسك كويس ، في واحد بيحب أوي يشتغل تحت ضغط بينجز ويعمل شغل محصلش ، وواحد تاني متحفز لو خد أي شغل يعمله في ساعتها ، فأنت دورك أنت ماشي في المواضيع دي إنك تعرف نفسك وتعرف بتحب إيه بالفعل وبتكره إيه وإيه بيساعدك أكثر علشان تقدر توصل أبعد .
- متنبهرش بالأشخاص ، انبهارك بالأشخاص دافع ليك على التقليد ، والتقليد هيخليك نسخة أقل من الشخص ، وهيوقفك عن الوصول لأبعد وهيحسسك إن اللي قدامك سوبرمان مبينفعش توصله .
- المجالات كتير جدًا ، ولكـن في أساسيات ، والأساسيات نفسها كتير جدًا ، ولكـن ما لا يسعك جهله في الأساس هو المهم ثم بعد كده ييجي الانتقال لما هو أكبر ، وييجي التخصص في شيء ما أو أشياء ف طبيعي إنك مش هتقدر تعمل كل الحاجات بنفس الكفاءة .
- اهتم بالفلوس ، اهتم إزاي يبقى معاك ما يكفي من الفلوس اللي تخليك تقدر تفرغ جزء من وقتك علشان تتعلم وتزود نفسك في حاجات تانية ، لو أهملت النقطة دي هتتعب لدرجة إنك ممكن تتوقف تمامًا ، والموضوع ده يمكن من أصعب المواضيع في البداية ، والتاريخ حافل ب علماء مكنوش لاقيين اللقمة حتى ولكن اهتم بده وحاول . .
- اتكلمت مرات على إن الواحد أفضل من الصفرر ، والصفر أفضل من السالب والناس وصلها المفهوم ده فمفيش داعي إننا نكرر ، وكفاية علشان الكلام كتير ومحدش هيقرأ ولا هيشوف .
المفروض إننا مدخلناش في الموضوع لسـه . . لسه في حاجات كتير ولكن خلونا نمشي بعدين بشكل أكثر تفصيلًا .
بعد ما عرفت كل الكلام ده إيه اللي يتعمل برضه ؟
- كراسة صغيرة ، أو كشكول ، أو أجندة ، أو ملف ورد على الللاب ، أو أي حاجة ورقتين تقدر تكتب فيهم اكتب أهم حاجة متحطش وقت كبير على الكلام الفارغ والانتظار ، يعني مش هستنى لما أنزل يوم الاتنين أجيب كشكول سلك جديد عليه تويتي مفيش الكلام ده .
هتبدأ في الكراسة دي لمدة أسبوع ، ولو زودت عن أسبوع يبقى أفضل لو أسبوعين جميل
كل اللي عليك إنك هتسجل روتينك اليومي بتفاصيله المملة كلها ..
وكل ما تزود المهلة اللي أنت بتعمل فيها ده كل ما كان أفضل لإن ده ضمان إنك هتقدر تفهم أنت بتعمل إيه أكتر . .
كل تفاصيل يومك اكتبها ، قعدت أكلت نص ساعة ، روحت لفلان قعدت ساعة ، كان في شيء طارئ لازم تزور والد واحد صاحبك ، كل حاجة تقدر تكتبها اكتبها .
كل اللي عليك إنك هتسجل روتينك اليومي بتفاصيله المملة كلها ..
وكل ما تزود المهلة اللي أنت بتعمل فيها ده كل ما كان أفضل لإن ده ضمان إنك هتقدر تفهم أنت بتعمل إيه أكتر . .
كل تفاصيل يومك اكتبها ، قعدت أكلت نص ساعة ، روحت لفلان قعدت ساعة ، كان في شيء طارئ لازم تزور والد واحد صاحبك ، كل حاجة تقدر تكتبها اكتبها .
بعد الفترة دي هيبقى معاك كشكول مختصر ماضيك ، واللي منه هتبدأ تحاول تحاول تغير شيء ما لحد ما الموضوع في النهاية تبصله كده تحس إنك مش نفس الشخص ، أو المسافة بين الشخص الأول والاخير مسافة كبيرة جدًا .
هتبدأ من ده تحلل يومك كده ، متوسط تضييع الوقت في اليوم ، متوسط الشيء المفيد اللي بتعمله ، متوسط الوقت الضايع في شغلك اللي مضطر تشتغله علشان تجيب فلوس ، وفي الحاجات التانية اللي مجبور عليها ، كل شيء تقدر تسجله وتدونه اعمل كده ده مهم جدًا جدًا .
حللت يومك ، طلعت كل حاجة ، عرفت يومك بيضيع إزاي ؟ حلو جدًا اتنقل للخطوة اللي بعدها .
طب أنا هروح على الخطوة رقم اتنين علطول . . في الغالب أنت بتهرج ، يعني لو مش قادر تلزم نفسك يوميًا لمدة أسبوع ولا اتنين إنك تلتزم بشيء ما ف دي مشكلة كبيرة المفروض إنك تتخلص منها سريعًا وتجبر نفسك إنك تعمل ده .
لإن المراقبة ضرورية ، مهما كانت أفكارك عن نفسك اركنها خالص على جنب وابدأ مع نفسك كأنك لسه بتتعرف عليها وأنت بالفعل في الغالب لسه بتتعرف عليها وده اللي أنت هتكتشفه .
لإن المراقبة ضرورية ، مهما كانت أفكارك عن نفسك اركنها خالص على جنب وابدأ مع نفسك كأنك لسه بتتعرف عليها وأنت بالفعل في الغالب لسه بتتعرف عليها وده اللي أنت هتكتشفه .
خلي معاك كلمة السر دايمًا = أي خطوة بتفشل فيها عيدها تاني ، حاول تاني ، كرر تاني ، جرب تاني ، داوم تاني .
ومتنساش سجل كل شيء ، خليها كل ساعة ، كل اتنين ، كل نص يوم على حسب قوة ذاكرتك في الحفاظ على ده ومتنساش كل النصايح دي تختلف بإختلاف الشخصية بتفهم الفكرة وتجرب بطريقتك .
حدد عدد مجالات عاوز تحقق شيء فيها ، حدد الشئ اللي عاوز تحققه فعلًا . ( لو مش عارف ابدأ بأساسيات كل مجال لحد ما ربنا يرزقنا )
طبعًا مهم إنك يكون عندك هدف عام بتنطلق منه ( أنفع نفسي والناس اللي حواليا ) ، ( أعمل شيء بناء يساعدني والناس اللي حواليا ) ، ( أحل مشكلة عندي وعند الناس ) ( عندي بس ) ( أقف على ثغر وأحاول أقدم اللي أقدر عليه فيه )
كل ده رؤية أو خطة بعيدة ، أو هدف عام .
كل ده رؤية أو خطة بعيدة ، أو هدف عام .
وصلت ل ده ادخل على النقطة التالية ، وهي تحويلها لمراحل ، والمراحل لأهداف مزمنة ، ومش لازم خالص ومش هيحصل إن الرؤية كلها تبقى قدامك واضحة ، متنساش الخطط معمولة علشان تتكسر .
مثال : عاوز أنفع نفسي والناس اللي حواليا . .
كلام حلو خالص بس ده تقوله في انترفيو شركة ولا أما تبقى رايح تحرر الأقصى ، لكـنه في الحقيقة كلام ملوش لازمة في مستوى الفعل .
كلام حلو خالص بس ده تقوله في انترفيو شركة ولا أما تبقى رايح تحرر الأقصى ، لكـنه في الحقيقة كلام ملوش لازمة في مستوى الفعل .
عاوز أنفع نفسي والناس اللي حواليا عن طريق إني أتعلم العلوم الشرعية . .
أزيد شوية ، وأفضل خطوة ولكـنه مازال ملوش لازمة على مستوى الفعل .
أزيد شوية ، وأفضل خطوة ولكـنه مازال ملوش لازمة على مستوى الفعل .
عاوز أتعلم علوم شرعية وابدأ بالمنطق
تصور أحسن كتير ولكن ملوش لازمة عملية .
تصور أحسن كتير ولكن ملوش لازمة عملية .
عاوز أتعلم علوم شرعية وابدأ بالمنطق بالسلم المنورق .
كويس وملوش قيمة .
كويس وملوش قيمة .
عاوز أتعلم علوم شرعية عن طريق إني أتعلم المنطق في شيخ العمود في الدورة الموجودة على يوتيوب .
أحسن بس لسه .
أحسن بس لسه .
عاوز أتعلم علوم شرعية عن طريق إني أتعلم المنطق في شيخ العمود في الدورة الموجودة على يوتيوب ، هما 24 حلقة هشوف حلقة كل يومين يعني هاخد ساعة في اليوم لمدة 48 يوم .
بيرفكت . . ابدأ اشتغل وقيم مجهودك وشوف هتزود ولا هتقلل .
اعتمد على التكرار ، والتعديل والتكرار ، والتكرار والتكرار ، والمحاولة والتكرار . . مفيش حل كرر لحد ما توصل ، غير وعدل وكرر .
اعتمد في البداية على الحاجات الثابتة اللي أنت محددها ، وأنت طبعًأ هتحددها على حسب الوقت . .
وليكـن مثلًا أنت عندك 5 ساعات فاضيين بعد كل الهرس اللي بيحصل يوميًا . .
لما تيجي تبدأ وتحط خطة متحطليش خطة تشغل 5 ساعات ولا حتى 4 ساعت ، ولا 3 . .
ساعة كفاية في البداية . .
وليكـن مثلًا أنت عندك 5 ساعات فاضيين بعد كل الهرس اللي بيحصل يوميًا . .
لما تيجي تبدأ وتحط خطة متحطليش خطة تشغل 5 ساعات ولا حتى 4 ساعت ، ولا 3 . .
ساعة كفاية في البداية . .
وأنت بتعمل الخطة أو الجدول أنت بتحط الساعة دي أساس . . ثم ؟
لو هتزود ده من عندك حط لنفسك بونص إنك زودت ساعة إضافي على شغلك بس ده مش معناه أبدًا إنك تعمل الحركة اللطيفة بتاعت أنا أخدت ساعة زيادة في يوم السبت ف يوم الخميس أنا مش هعمل حاجة ( لا ) الزم نفسك أنك تعمل اللي انت محددة ، ولو أنت زودت ف الزيادة دي متدرجهاش جوا الأساسي ، امتى الزيادة دي يعتد بيها لما تبقى نمط عام ، لما تلاقي إن معدلك كله زاد ل ساعتين ، مع الاستمرارية هيزيد تلقائي ، وممكن تملى الفراغ الباقي في الخمس ساعات ده بشيء ما مفيد بس خليه إضافي . .
متخليش عقلك يصورلك أنك فاشل ، وإنك المفروض توقف ، خلي الأساسي في البداية قليل ، لو مبتقدرش على ساعة خليها أقل من ساعة ، وبعدين بتبدأ تتدرج واحدة واحدة لحد ما الأمور تزيد . .
طب إحنا اتكلمنا في حالة إنك مقدرتش تلزم نفسك بالساعة اللي أنت اتفقت ( مع نفسك ) عليها . . هتعمل إيه ؟
ملحوظتين كده صغيرين . .
- أنت موقفتش كتابة في ( كراسة الإنجاز ) يوميًا أنت شغال زي ما أنت .
- أنت عارف إنك طبيعي إنك متلتزمش المهم إن جدولك يسمحلك إنك تعاقب نفسك بالزيادة في وقت تاني .
- أنت عارف إن التخطيط عملية مستمرة ، يعني مش مرة وهتقف ، لا د أنت مستمر في ده للأبد ، وهتعدل وتغلط وتصحح وتوفر معلومات كتير لناس بدأوا بعدك .
الخطة فشلت ، أنا ملتزمتش . . ، أنا بدل ما المفروض أعمل ( س ) عملت ( ل )
حلو أوي ، أنت مكمل في خطتك زي ما أنت ، وبتكتب كل شيء حتى السبب اللي خلاك وقفت . .
حلو أوي ، أنت مكمل في خطتك زي ما أنت ، وبتكتب كل شيء حتى السبب اللي خلاك وقفت . .
حاول تتخلص من السبب اللي خلاك تسيب س ، وحاول توقف بقدر ما اللي حصل في ( ل )
أنا كنت بسمع المحاضرة في الاقتصاد ولقيت نفسي زهقان جدًا ومقدرتش أكمل ونزلت مع أصحابي . .
ارجع تاني اسمع المحاضرة مرة واتنين وتلاتة واضرب نفسك بالجزمة وعلمها الادب ، وعرف صحابك إنك هتنزل معاهم لما تخلص ال ( س ) هيتريقوا متقولش بس عرفهم إنك مشغول في البيت وأول ما تخلص هتنزل ، وهكذا . . اتصرف .
اليوم اللي تفوته ازنق المطلوب منه في يوم تاني ، طيب إذا كان الموضوع تراكم لدرجة إنه صعب إنك تكمل هتشوف في اليوم 3 ساعات وأكتر؟
هد الجدول من اللحظة دي ، وكمل على اللي أنت عملته من اليوم اللي بعده علطول .
اوعى تبدأ من الأول ، اوعى تقول اللي اتعمل ده مش حلو أنا هوقف وأرجع من الأول ، ابدأ من النقطة اللي أنت وقفت عندها ، وكمل وزود ..
طبعًأ ده كلام في الأساسيات ، والأمر بعد كده بيتشعب كل ما تضيف مهمة جديدة إنما أدينا بدأنا والله أعلم ممكن نكمل امتى . . ولو حد وصل لحد هنا ف أنا بشكرك ، أنا ممكن أعمل الحلقات أقل بكتير ، ولكـن الواحد لما بينقاد للواقع أزيد من اللازم بيبقى الموضوع صعب جدًا ، وأنا من هواة الإسهاب فيما يجب الإسهاب فيه ، ونشوفكم على خير يارب
ماتبطّلش حلقات، وماتبطّلش إسهاب أبدًا، أنا وصلت لآخر سطر بكامل التركيز، أسأل الله السداد وحسن الانتفاع، حضرتك كنت محقّ جدًا لما قولت إن كثرة المحاولات بتُثرينا وتخلينا نقرأ الواقع أكتر - وإن بدا عكس ذلك-، وأكبر دليل الإسهاب العظيم ده.. أظنه ليس إلا نتاج محاولات لم تكتمل. ربنا يرضى عنك ويجزيك عنّا خير!
ردحذف