صاحبك اللي عمال يجمع في خطط لدراسة كل وأي شيء ده في الغالب لو استمر بنفس الأسلوب في التعاطي مع معطيات الواقع هتلاقيه بعد سنتين عمل حاجة من اتنين . .
إما إنه مازال بيجمع خطط ومقتنع إنه هيجمع الخطط إن شاء الله في تلاتين سنة ، ويذاكرهم في تلاتين زيهم . .
إما إنك هتلاقيه ساب الطريق كله ، زهق ومل وحس إن الموضوع صعب وإنه مش هيقدر عليه إضافة إلى القدر الغير ممكن التعايش معاه من التشتت اللي هيكون عنده .
تجميع الخطط شيء مش سئ ولا حلو برضه ، ولكـن هي مرحلة اللي هيفضل واقف عندها مش هيحقق أي حاجة في أي حاجة . .
أقصر مسافة بين نقطتين هي الخط المستقيم ده هناك في الفيزياء - بدون الخوض في الحديث عن التشوه الحادث في الاسبيس تايم والنسبية العامة والخط المستقيم اللي مش هيبقى خط مستقيم - لكـن في الطبيعي مفيش حاجة اسمها خط مستقيم هتمشي عليه من البداية للنهاية ، مفيش حاجة اسمها إنك هتدرس الكتب دي وتطلع عالم أنت في الغالب مش هتقدر تعمل ده ، وهتفضل تمشي على سطر وتسيب سطر ، وخصوصاً إن كنت بتتعلم ذاتياً وفي حاجات بتثيرك وتجذب انتباهك هتضطر تقربلها . .
مش بس كده ده في مشكلة تانية وهي اللي ناقشها الأستاذ محمد منير مراراً وهي إن كل المفروض مرفوض . .
المصيبة إنك أحياناً هتحس إن اللي أنت فرضته على نفسك هو مفروض برضه ، وبالتالي مش هتقدر تنتظم فيه بشكل ما . .
المعنى من كل الكلام ده إنك المفروض تبدأ ، تبدأ بعشر دقايق ب ربع ساعة المهم تبدأ دلوقتي لإنك بعد شوية برضه هتفضل تضيع وقت لحد م تقرر في لحظة ما إنك تبدأ وساعتها هتقعد تضيف على نفسك حزن على الوقت اللي فات وندم وخوف على اللي جاي ربما يقعدك ده عن تحقيق اللي أنت عاوزه ، وربما تكون أصلاً دي حالة بعضنا دلوقتي . .
اتحرك واعمل حاجة بدل التجميعات الفارغة ( إلا لو أنت مدرك ده فجمع براحتك ) .
إرسال تعليق