8.كل ما تحتاجه في دورات م. أيمن عبدالرحيم ( تفريغات - لينكات - ترشيحات - تكليفات - مراجعات كل الدورات )

بمناسبة إن الناس هتخلص امتحانات قريب . .

موضوع إدارة الوقت ده من أكثر الموضوعات اللي فيها مشكلة عند كثير من الشباب الصغير ، والمشكلة دي بتفتح المجال لكتير من الناس اللي لا عندهم علم ولا وعي ولا معرفة إنهم يعملوا كورسات وقصص وحوارات والموضوع كله لا يحتاج كل ده .

كلماتي الأثيرة هي إنك لو عاوز فعًلا تعمل شيء هتعمله إنما لو أنت فقط قاعد على السرير كده ومأنتخ وفاتح الفيس بوك وبتتفرج على البوستات ومستسلم تمامًا ولما تتفتح قصة إنك تستفيد من الوقت ده فتقول لا أصل المشكلة في تنظيم الوقت ده كله فشنك ، لو عاوز هتتحرك وهتعمل .

كل الكلام النظري عن إدارة وقتك لا يعول عليه مادام عنصر الصدق نفسه مش موجود ، ثم تبدأ تتحرك بقى . . هتعمل خطة ليوم أو اتنين أو أسبوع أو سنة كل ده مش مهم ، المهم إن الجيل القديم في إدارة الوقت بيعمل " to do list " وبيمشي بيها يعلم على اللي هو حققه كل يوم .

حضرتك هتقول مثلًا أنا هسمع المحاضرة الفلانية وهي ساعة ونص مثلاً ، وقول أنت عظيم وبتكتب كل حرف وهتاخد كمان ساعة يبقى احنا بنتكلم في ساعتين ونص يبقى خلاص هلتزم بالروتين اليومي ده اللي هو الساعتين ونص طب والله جربت ومنفعش خلاص قلل المعدل شوية لحد ما يبقى المعدل مقبول ، والمعدل المقبول هو مقبول لطموحك يعني مش هتبقى عاوز تبقى سيبويه وأنت بتذاكر لغة عربية ربع ساعة في الأسبوع طبيعي ومنطقي إنك بتضحك على نفسك ، فالمعدل اليومي ممكن تبدأ بيه قليل جدًا ربع نص ساعة يوميًا مفيش مشكلة بس تبقى فاهم إنك هتزوده علشان يناسب طموحك بعد كده . .

تقدر تقولي هنا إيه مشكلة إدارة الوقت في الموضوع ؟
يعني إيه اللي الوقت بقى عاملك أزمة فيه كده ؟

إنما لما ربنا يفتحها عليك بقى وهتشوف محاضرة واتنين وتلاتة وعندك عشر ساعات من وقتك وعاوز تحقق أقصى استفادة فيهم هنا نقدر نتكلم عن فكرة " إدارة الوقت " وإزاي تقدر تنظم يومك بالقدر اللي يخرجلك أقصى استفادة . .

وده مش صعب أبدًا ..

أنا عندي مثلاً عشر ساعات ، وعندي هدف كبير بنطلق منه ، الهدف الكبير ده باخد منه فكرة يمكن تطبيقها على الأرض . .

مثال : عاوز أخدم المسلمين = ده هدف عام كده لازم ينزل للأرض .
هينزل للأرض عن طريق إنك عاوز تتقن مثلاً لغة إنجليزية وتعلم الناس ، تتعلم اقتصاد وتفيد الكوكب وما إلى ذلك . .

خلاص في خطة للكلام ده ؟ لو في خطة يبقى الأمر بسيط قسم الخطة دي بشكل يومي أو أسبوعي .

- ملحوظة مهمة : كثير من الناس مؤخرًا بيقعدوا يدوروا على الخطط وبس علشان ميعملوهاش علشان يعقدوا نفسهم وبس ، ولذلك أنا من فترة كل ما حد ييجي يقولي عاوز أتعلم ( س ) أديله حاجة واحدة بس أقوله خلصها وكلمني

والمفاجأة : أقسم بالله من كل 20 واحد في واحد بيكمل الحاجة الواحدة اللي أنا قولتله عليها ، ودي كارثة ولكنها متوقعة جدًا ، ولكن ده برضه لا يمنع إن الخطط الكبيرة مفيدة .

قسمت الخطة بشكل يومي . . خلي بالك بقى

الخطة لو هتحتاج سنة أنت أديلها رانج سنة ونص سنتين
الخطة تبقى مرنة جدًا بحيث تسمحلك إنك تعدل فيها تشيل تحط كله عادي
الخطة متبقاش بشكل يومي ( شبه يومي ممكن ) خلي في وقت للراحة .
الخطة لو محتاجة ساعة في اليوم اعملها في الجدول ساعتين .

حط رانج يعني مثلاً أنا هقرأ السنة دي كام كتاب . .
خليها رانج قول مثلاً الحد الأدني إني أقرأ كتاب في الشهر ( مثلًا ) يبقى معايا في السنة 12 كتاب ، المعدل المتوسط كتابين يبقى = 24 ، المعدل الجاحد جدًا 3 وهكذا . .

بحيث متبقاش مقريف وهتوقف علشان مخلصتش .
لو أنت معندكش ثقافة المالتي تاسكس يبقى بلاش . .

امشي في الخطة واحدة واحدة يعني مثلًا أنت عاوز تشوف 20 كورس ( نحو ، بلاغة ، انجليزي ، ومنطق ، وفلسفة ، وعلم نفس .... )
امشي في الخطة واحدة واحدة

خد المنطق لوحده في خطة خلصه وانهيه خالص من حيث الأساسيات وبعدين انتقل .

اعرف إن أنت لو عاوز تعمل 10 وجبت 1 ده معناه إنك مجبتش صفر ( برافو يا حبيبي الواحد حاسس إنه حمادة هلال ) يعني انك تجيب واحد ده حلو والله مش وحش ، ممكن يكون مش مناسب لطموحك بس أنا عاوز أقولك إني أحيانًا كنت بعمل الخطة كاملة ومببدأش فيها والله الموضوع عادي جدًا المهم اللي بعد كده الاستمرارية بتخلقك من جديد.

ف نهاية المطاف اللي عاوز أقولهولك خد خطوة واعمل أخطاء تخليك تعرف تسأل وتقول أنا عندي مشكلة كذا وتبحث والناس تساعدك إنما اللي على البر وبيسأل ده هيخسر كتير لحد ما يبدأ يحط رجله في الماية .

دي بعض النصايح كده علشان مواسم الأجازات الجميلة ، وسامحوني لإن معظم الكلام ارتجالي وأتمنى تكونوا جميعًا بخير ، ودعواتكم لينا وليكم بالخير  .