8.كل ما تحتاجه في دورات م. أيمن عبدالرحيم ( تفريغات - لينكات - ترشيحات - تكليفات - مراجعات كل الدورات )

الطبيعي في الحياة وخصوصًا في العصر الحالي هو إن الإنسان يبقى مش عارف هو عايز إيه بالظبط بينازع ما بين أكثر من حاجة ، بيمشي في طرق كتير ومبيكملش ، وبياخد خطوة في كل علم ويتوقف ، بيحس باللاجدوى كتير وبيحاول قدر طاقته إنه يحاول يسيطر على نفسه وينتظم ولكـن في الغالب مبيوصلش للي هو عاوزه ، العلوم كثيرة جدًا ، والطرق في كل علم متشعبة جدًا ، والإنسان صعب إنه يحاول يركز على حاجة في عصر التشتت .

ناهيك على إن الإنسان بياخد فترة طويلة من حياته مش مدرك أصلًا إيه اللي هو المفروض يعمله ، ولما ييجي يبدأ يحس إنه بدأ متأخر ، ومن هنا بتيجي الأزمة لما الإنسان يبدأ يتفتح فيلاقي إنه قدامه حاجات كتير جدًا وهو دخل كلية معينة ومش عارف أصلًا يمشي فين .

وهنا بتبقى مشكلة أنا في كلية ومش لاقي شغفي واللي أنتجت لنا العبارة الشهيرة سيئة السمعة " اتبع شغفك " فالناس اللي جربت تتبع شغفها لقت إن الموضوع مش بالبساطة دي وإن الشغف ده مكنش شغفها أصلًا .

مشكلة فكرة الشغف إنها فكرة خدّاعة جدًا . .
يعني ناس كتير بتدخل كلية مبتحبهاش ، ولما تدخل الكلية دي وبعد فترة اجتهاد على أساس إنه هو ده الموجود وخلاص بتلاقي نفسها أتأقلمت وحبت المجال ، وحب المجال هنا ناتج عن احتراف الشخص للمهنة ومع الاحتراف ده بيلاقي الحب .

في ناس تانية بتدخل المجال وهي مبتحبوش وبالتالي بتهمله تمامًا وبعد ما تتخرج تفاجئ إنها ضيعت سنين حياتها لا هي استفادت من الكلية شيء بل محتاجين يبدأوا من الأول تاني وده صعب ، وصعب كمان إنه يبدأ مجال تاني فيتوقف ودي مشكلة كبيرة .

الأساس عندنا إنك الطبيعي إنك متبقاش قادر تدرك إيه هو شغفك ده ، وعلشان كده تلاقي حد شغفه كلية الطب وأول ما يدخل كلية الطب يصدم بالواقع السيء جدًا وميقدرش يكافح في غياهب الحفظ وانعدام المعنى في الاتباع فيبدأ يسقط سنة ورا سنة وممكن يكره المجال ككل . .

فأهم حاجة عين شغفك دلوقتي على الرف لإنك مش متأكد منه في الغالب وحاول تطلع على أكبر كم ممكن من المجالات ، يمكن ده الضمان الوحيد للإنسان إنه يجرب معظم الموجود ، أو معظم اللي هو بيحبه . . 

يعني أنت يمكن تكون بتحب الاقتصاد والتاريخ وعلم النفس
طب ما كل الناس بتحب الاقتصاد والتاريخ وعلم النفس بس عارف بيحبوه ليه ؟
لإنهم ميعرفوش عنهم حاجة أصلًا ، لإن حبك للشيء في كثير من الأحيان يجب إنه يكون تالي لتعرفك بشكل كبير على العلم ده ، إنما فكرة الحب من أول نظرة ده في العلوم فكرة مميتة لإنها مش هتفيدك ولا هترفعك على العكس ، أنت المفروض تطلع وبعدين تشوف أنت حبيت إيه وعاوز تكمل ولا تتوقف .

وهنا كانت نصيحة مولانا إنك في الفترة اللي أنت مش عارف أنت المفروض تروح فين اتعلم كل المهارات الأساسية اللي ممكن تعينك على ده . . 

يعني كل الناس محتاجة إنها تعرف إزاي تذاكر ، محتاج تعرف إزاي تفرغ أو تاخد ملاحظات من حاجة بتشوفها أو بتسمعها ، محتاج تتعلم إزاي تتعلم ، محتاج تكتب بسرعة ، وتقرأ بسرعة ، محتاج تعلي همتك تخلي شيء دافع ليك دايمًا يفيدك في طريقك ، محتاج تعرف تكتب على الكيبورد ، محتاج تنظم الربكة بتاع السوشيال اللي حواليك دي ، محتاج تستبدل كل عادة ملهاش قيمة بعادة مفيدة تزيدك ، محتاج تتعلم تدير وقتك بطريقة صحيحة وتتحكم في صداقاتك بالشكل اللي يخلي إنتاجيتك وإنجازك أعلى في اتجاه معين .. 

حاجات كتير من دي ممكن تكون عندك أصلًا طبيعي ، ممكن تكون بتفتح الفيس بوك أصلًا كل يومين تلاتة وبالتالي الفيس بوك مبيمثلش مشكلة ليك ولكـن صداقاتك كتير بالشكل اللي يخلي إنتاجيتك برضه قليلة وهكذا . . فأنت على أي حال مهم إنك يكون عندك مجموعة من الأدوات دي اللي هي هتفيدك في أي شيء ، وفي وسط ده كله تركز على تعلم اللغات عمومًا ، والعربية والإنجليزية خصوصًا وجبرًا في كثير من الأحوال .

يراجع في هذه السلسلة بالعموم :
كلام م. أيمن عن رحلته ، قناة علي محمد علي كلها .